ل عیراقێ زێدەترین رێژەیا خودان پێدڤییێن تایبەت ل جیهانێ هەیە
گاڤ
ل ئیراقێ زێدەترین رێژەیا خودان پێدڤییێن تایبەت ل سەرتاسەری جیهانێ هەیە و ل گۆرەی رێخراوەکا نێڤدەولەتی، پتریا وان ژ دەلیڤەیێن کاری دبێبەهرن.
ل ئیراقێ ژ ئەگەرێ شەڕ و ئالۆزی و نەئارامییا بەردەوام، پتری 3 ملیۆن خودان پێدڤییێن تایبەت هەنە کو ئەڤە دبیتە زێدەترین رێژەیا خودان پێدڤییێن تایبەت ل ئێک وەلات. ل گۆرەی یاسایا ئیراقێ، پێدڤییە ٪5 یا فەرمانبەرێن حکومی و ٪3 یا کارمەندێن کەرتێ تایبەت، خودان پێدڤییێن تایبەت بن، لێ ل گۆرەی راپۆرتەکا رێکخراوا هیۆمەن رایتس ووچ، کار ب وێ یاسایێ ناهێتە کرن و پتریا خودان پێدڤییێن تایبەت دبێکارن.
ل هەرێما کوردستانێ 77 هزار و 65 خودان پێدڤییێن تایبەت د تۆمارێن حکومەتێ دا هەنە، ل گۆرەی ئەو ئامارێن دیندار زێباری، رێکخەرێ بەرسڤدانا راپۆرتێن نێڤدەولەتی یێ حکومەتا هەرێما کوردستانێ داینە هیۆمەن رایتس ووچ، تا دویماهییا سالا 2022یێ، 13 هزار و 249 خودان پێدڤییێن تایبەت ل هەرێما کوردستانێ فەرمانبەرێن حکومی نە کو ئەڤە دبیت ٪3 یا سەرجەمێ گشتی یێ فەرمانبەرێن هەرێما کوردستانێ.
ل گۆرەی یاسایێن بەرکار یێن هەرێما کوردستانێ، پێدڤییە ٪5 یا فەرمانبەرێن حکومی خودان پێدڤییێن تایبەت بن و هەرچەندە ل هەرێما کوردستانێ یاسایێ نەکرییە مەرج ب چ رێژە خودان پێدڤییێن تایبەت ل کەرتێ تایبەت کار بکەن، لێ هەر کۆمپانییەک یان جهەکێ نەحکومی یێ خودان پێدڤییەکێ تایبەت بدەتە کاری، حکومەت ل سێ مەهێن دەستپێکێ ٪50 یا مووچەیێ وی خودان پێدڤییێن تایبەت ددەت.