24 هه‌زار خێزانێن شنگالێ دناڤ كەمپان دانە
سه‌ما
وه‌زارەتا كۆچ و كۆچبەرێن عيراقێ بریار دایە ل داویا ڤێ هەیڤێ كەمپ نەمینن و بێنە گرتن، ژ ترسا دائێخستنا كەمپان ئاواره نەچاربووینە ناڤێن خۆ بۆ زڤرینا شنگالێ تۆماربكەن هه‌مبه‌ر وه‌رگرتنا گوژمێ چار ملیۆن دیناران يێ قه‌ره‌بوويێ.
شاكر خدر،وه‌لاتيه‌كێ خه‌لكێ شنگالێ يه بۆ سه‌ما خوياكر،بريارا دائێخستنا كه‌مپان يا دروست بوو هاتيه دان،هه‌ر ديسان لگه‌ل ڤه‌گه‌ريانا به‌رده‌واما ئاواره‌يان بۆ شنگال پێدڤيه ژينگه‌هه‌كا گونجاى و خزمه‌تگۆزاريێن سه‌ره‌كى يێن ژيانێ بێنه ل به‌رده‌ستكرن و قه‌ره‌بووكرنا خه‌لكى يا گره‌نتيكرى بت.
فێسه‌ل خانه‌سۆرى،چالاكڤانه‌كێ سڤيل يێ خه‌لكێ شنگالێ ل كه‌مپا بێرسڤێ بۆ سه‌ما گۆت:ژڤانێ دائێخستنا كه‌مپان يێ كورت و به‌رته‌نگه و ڤه‌گه‌ريانه‌كا ب نه‌چارى ده‌ستپێكريه و ئاواره‌يان وه‌ك كارته‌كا سياسى بكارتينن، گه‌له‌ك خێزانان مامه‌له‌يێن ڤه‌گه‌ريانێ ته‌مام كريه لێ هێشتا چه‌كێ به‌خشينه‌يا 4 مليۆن ديناران و كه‌لوپه‌لێن ناڤ مالێ وه‌رنه‌گرتيه.
ل دۆر هه‌مان پرس،سلێمان فانۆ به‌رپرسێ بنگه‌هێ لالش تايێ سنوونێ بۆ سه‌ما دبێژت:پێدڤيه حكومه‌تا عيراقێ ب ئه‌ركێ خۆ ڕابت و ب ڕێيه‌كا شايسته ئاواره‌يێن شنگالێ قه‌ره‌بوو بكه‌ت،ئه‌و ژى گوژمه‌يێ هاتيه دياركرن بۆ ڤه‌گه‌ريانێ يێ كێمه و دڤێت زێده بكه‌ن داكو خه‌لك بكارن دووباره ده‌ست ب ئاڤه‌دانكرنا خانيێن خۆ يێن وێرانكرى ژلايێ داعشێ ڤه بكه‌ن،ئه‌م داخواز دكه‌ين يوئێن و لايه‌نێن په‌يوه‌نديدار ب رژدى ل سه‌ر هێلێ بن ژبۆ ديتنا رێكه چاره‌سه‌ريه‌كێ ژبۆ ره‌وشا ئاواره‌يێن شنگالێ ل كه‌مپاندا.
هه‌روه‌سا پیردەیان جەعفەر،ڕێڤەبەرێ كۆچ و كۆچبەران ل دهۆكێ بۆ سه‌ما ئاشكه‌راكر: 15 كەمپێن ئاواران ل پارێزگەها دهۆكێ و ئیدارا سەربەخۆیا زاخۆ هەنە و چو كەمپه نائێنە دائێخستن،حوكمەتا هەرێما كوردستانێ هەڤكاریا هەموو كەمپێن ئاواران ل دهۆكێ دكەت و دێ هاریكاری و پشتەڤانى بۆ ئاواران یا بەردەوام بت،ئه‌ڤ بڕیارا حكومه‌تا عیراقێ بۆ دائێخستنا كەمپان نەیا د جهێ خۆ دابوو، هەتا نۆكە هێشتا 24 هه‌زار و 800 خێزان د ناڤ كەمپان دا ماینە.
ل گۆڕەی بڕیارا حكومەتا عیراقێ،تنێ 20 ڕۆژ ماینە دەرگەهێ كەمپان بێنە دائێخستن،بەلێ هەتا نۆكە ب تنێ هه‌زار و 200 خێزانێن ئاواره‌يێن شنگالێ ڤەگەڕیاینە دەڤەرێن خۆ.
گوژمێ چار ملیۆن دیناران وەك هاریكاری بۆ وان خێزانێن ڤەدگەڕن دئێنەدان، ئەڤە ژی گوژمەكێ گەلەكێ كێمە و ب تنێ وان خێزانان ژی ڤەدگرت یێن د ناڤ كەمپان دا دژین.