سه‌ما
سەرۆك مەسعود بارزانی د بیرەوەرییا دەربازبوونا 10 سالان ب سەر جینۆسایدا كوردێن ئێزدی دا، پەیامەك بەلاڤكر و تێدا ڕاگەهاند، جینۆسایدا ئێزدییان برینەكە ل سەر لەشێ گەلێ كوردستانێ.
دەقێ پەیاما سەرۆك بارزانی:
بناڤێ خۆدێ مەزن و دلۆڤان
جینۆسایدا شنگالێ و ئەو تاوانا تیرۆرستێن داعشێ 10 سالان بەری نوكە دژی خوشك و برایێن مە یێن ئێزدی ئەنجام دای، برینەكە ل سەر لەشێ گەلێ كوردستانێ. ئەو تاوانە هەڤشێوە و درێژەپێدەرا وان جینۆساید و كۆمكوژی و تاوانایە یێن كو ب درێژاهییا دیرۆكێ بەرامبەر گەلێ كوردستانێ هاتینە ئەنجامدان. خوشك و برایێن مە یێن ئێزدی ژبەر كوردبوون و بیروباوەرێن ئایینی كەفتنە بەر هەوا دڕندەییا تاوانبارێن داعش و هاتنە جینۆساید كرن.
د دەهەمین سالڤەگەرا وێ كارەساتێ دا، سلاڤان بۆ گیانێ شەهید و قۆربانییێن وێ تاوانێ دهنێرین، سلاڤان بۆ گیانێ وان پێشمەرگێن قەهرەمان دهنێرین یێن بۆ شكاندنا ئابلۆقا چیایێ شنگالێ و ئازادكرنا باژێڕێ شنگالێ خوینا خۆ بەخشی و سەرێ داعشا دڕندە ئێخستییە ژێر پێ خوشك و برایێن مە یێن ئێزدی و تۆلا وێ زۆلمێ ژ تیرۆرستان ڤەكری.
د ڤێ برەوەرییا دلتەزین دا، دۆپاتییێ ل وێ چەندێ دكەین كو ب هەمی شیانان دێ پشتەڤانێن ماف و داخازییێن خوشك و برایێن ئێزدی و ئاكنجییێن دەڤەرا شنگالێ بین. پێدڤییە ڕێككەفتنا دناڤبەرا حكومەتا هەرێمێ و حكومەتا عیراقێ دا بۆ ئاسایكرنا ڕەوشا شنگالێ بهێتە جێبەجێكرن و ئەو ڕەوشا نەیاسایی و نەئاسایی یا دەھ سالە ب ناهەق ب سەر خەلكێ وێ دەڤەرێ دا هاتییە سەپاندن، ب دوماهی بهێت. پێدڤییە دوماهی ب هندێ بهێت لایەن ژان و ئازارێن شنگالێ بۆ مەرەمێن سیاسی و خۆسەپاندنێ و ئالۆزتركرنا ڕەوشا شنگالێ بكاربینن و پێدڤییە ڕێ بهێتەدان خوشك و برایێن مە یێن ئێزدی یێن شنگالێ ب سەربەرزی ڤەگەڕنە سەر مال و حالێن خۆ و د ئاشتی و ئارامییێ دا بژین.