سه‌ما
سەرۆکێ حکومەتا هەرێما کوردستانێ فەرمانا دامەزراندنا مامۆستایێن وانەبێژ یێن هەردوو وەزارەتێن پەروەردێ و خواندنا بلند ئیمزا کر.
ل ڕؤژا 28ى ته‌باخا 2024ێ، مەسرور بارزانی، سەرۆکێ حکومەتا هەرێما کوردستانێ فەرمانا دامەزراندنێ بۆ هەموو مامۆستایێن وانەبێژ ل وەزارەتا خواندنا بلند و ڤەکۆلینێن زانستی و وەزارەتا پەروەردێ ب شێوێ گرێبەست ئیمزا کر.
ب فەرمانا ژمارە (4142) ل 28ى ته‌باخا 2024، مەسرور بارزانی، سەرۆکێ حکومەتا هەرێما کوردستانێ فەرمانا دامەزراندنا وانەبێژان ب گرێبەست ئیمزا کر و تێدا هاتیە: ب رەچاڤکرنا رۆلێ مەزن یێ مامۆستایێن وانەبێژ د بەردەوامیدانا پرۆسەیا پەروەردێ و فێرکرنێ و خواندنا بلند دا، ئەڤ بڕیارە هاتە دان.
د خالا ئێکێ یا فەرمانێ دا هاتیە “دامەزراندنا هەمی مامۆستایێن وانەبێژ ل وەزارەتا پەروەردێ و وەزارەتا خواندنا بلند و ڤەکۆلینێن زانستی ب شێوێ گرێبەست ل دویڤ رێنمایێن دارایی ژمارە (10) یێن سالا 2019”.
هەروەسا د خالا دووێ یا فەرمانا سەرۆکوەزیران مەسرور بارزانی دا، هاتیە “هەردوو وەزارەتێن پەروەردێ و خواندنا بلند هاتنە راسپاردن ب وردبینیکرنا لیستا ناڤێن وانەبێژان و ئەنجامدانا رێکارێن دامەزراندنا وان”.
ل رێكه‌فتى25/8/2024ێ، سەرۆکوەزیران مەسرور بارزانی د کۆمبوونەکێ دا دگەل ژمارەکا نوونەرێن مامۆستایێن وانەبێژ، پشتی گوهدارکرنا داخواز و داخوازیێن وان، بڕیار دا ل سەر داهاتێ ناڤخۆیی یێ حکومەتێ، هەموو وانەبێژ کو ژمارا وان نێزیکی 38 هه‌زار کەس دبت، ببنە گرێبەست.
هه‌روه‌سا ل 26ى ته‌باخا 2024ێ، ئالان حەمەسەعید، وەزیرێ پەروەردێ یێ حکومەتا هەرێما کوردستانێ ب فەرمانا ژمارە 264، بڕیار دا ب پێکئینانا لیژنەیەکێ ل سەر ئاستێ وەزارەتێ بۆ هوربينيكرنێ د کۆما گشتی یا لیستا مامۆستایێن وانەبێژ یێن نەهاتینە دامەزراندن، کو بڕیارە رۆژا (5ـێ ئەیلوولا 2024) ڤەگەرت بۆ وەزارەتا پەروەردێ.
ئالان حەمەسەعید فەرمان دەرکر، پێدڤیە ئەڤ لیژنە هەتا (9ـێ ئەیلوولا 2024) کارێن خۆ یێن هوربينيكرنێ د لیستا وانەبێژان دا تەمام بکەن و پاشی ب نڤیسارەکا فەرمی ئاراستەی ئەنجوومەنێ وەزیران بکەن دا کو فەرمانا ب گرێبەستبوونێ بۆ دەربچت.
هەمان ڕۆژ وەزیرێ پەروەردێ یێ حکومەتا هەرێما کوردستانێ د نڤیسارەکێ دا کو ئاراستەی هەموو رێڤەبەریێن گشتی یێن پەروەردێ یێن پارێزگەهان و ئیدارێن سەربەخۆ کری، داخواز کر د ماوێ هەفت رۆژان دا هوربينى د لیستا مامۆستایێن وانەبێژ یێن نەهاتینە دامەزراندن دا بێتە تەمامکرن و ڕۆژا پێنج شەموويێ (5ى ئەیلوولا 2024 بۆ وەزارەتێ بێتە هنارتن.