سه‌ما
به‌شێ كاروبارێن مینان ل وه‌زاره‌تا ژینگه‌هێ یا عیراقێ دا ئاشكرا دكه‌ت، ئه‌و ده‌ڤه‌رێن داعش ب مین و پاشماوێن شه‌ڕی پیس كرینه روبه‌رێ وان 525 كیلۆمه‌تر چوارگۆشه‌یه.
مسته‌فا حه‌مید مه‌جید، رێڤه‌به‌رێ راگه‌هاندنا به‌شێ كاروبارێن مینان راگه‌هاند، قه‌بارێ وێ ده‌ڤه‌را پیس بووی ب مینێن چاندی ژلایێ گرۆپێن تیرۆریستی ڤه ل سه‌لاحه‌دینێ گه‌هشتییه 18 كیلۆمه‌تران، ل پارێزگه‌ها نه‌ینه‌وا 26 كیلۆمه‌تره، ل پارێزگه‌ها ئه‌نبار 181 كیلۆمه‌تره و ل پارێزگه‌ها دیالێ ژی 300 كیلۆمه‌تر چوارگۆشه‌یه.
رێڤه‌به‌رێ راگه‌هاندنا به‌شێ كاروبارێن مینان ئاماژه ب وێ چه‌ندێ ژی كر، هه‌ولدان ژلایێ ستافێ به‌شێ كاروبارێن مینان ڤه به‌رده‌وامن بۆ پاقژكرنا وان ده‌ڤه‌ران ئه‌ڤه ژی ژبلی وێ چه‌ندێ كو ده‌زگه‌هێن نێڤده‌وله‌تی و هنده‌ك ژ وه‌زاره‌ت و رێڤه‌به‌رییێن حكومی پشته‌ڤانیێ دكه‌ن.
سه‌رجه‌مێ روبه‌رێ پیسبووی ب مین و پاشماوێن شه‌ڕی ل عیراقێ د سه‌رده‌مێن جودا جودا و شه‌ڕێن بۆری دا زێده‌تر ژ شه‌ش هه‌زار كیلۆمه‌تر چوارگۆشه بوو، نێزیكی چار هه‌زار كیلۆمه‌ترێن چوارگۆشه هاتینه پاقژكرن هه‌تا نركه زێده‌تر ژ دوو هه‌زار كیلۆمه‌ترێن چوارگۆشه یێن مينكرى چاندی ماینه.