سه‌ما
کۆمپانیا مێتا، دایکا پلاتفۆرما جڤاکی یا فەیسبووکێ، ڕاگەهاند کو سیاسەتەکا نوو پەیڕەو کریە ئارمانجا وێ هاریکاریا چێکەرێن ناڤەڕۆکێ یە ل سەر پلاتفۆرمێ دا خۆ ژ سزایێن گران بپارێزن دەمێ ناڤەڕۆکەکا نە ل گۆر یاسایێن پلاتفۆرمێ بەڵاڤ دکەن. ئەڤ سیاسەتە دێ ب ڕێیا هشیاریان و پشتڕاستکرنا تێگەهشتنا سیاسەتان بیت، دا خۆ ژ سزایێن وەک گرتنا هەژمار و ڕووپەلان بپارێزن.
نووکە، فەیسبووک شێوازا شاندنا سەرپێچیان بۆ بکارهێنەر و چێکەرێن ناڤەڕۆکێ بکار تینیت دەمێ ناڤەڕۆکەکا نەگونجای دگەل سیاسەتێن پلاتفۆرمێ بەڵاڤ دکەن. د هندەک حالەتان دا، سزایێن سنووردارکرنا گەهشتنێ ڕاستەوخۆ تێنە سەپاندن، پۆست تێ ژێبرن، و هەتا گرتنا هەژمار و ڕووپەلان د حالەتێن سەرپێچیێن مەزن دا.
مێتا ڕاگەهاند کو گوهۆڕینەک د مامەلەکرنا دگەل سەرپێچیان دا هەیە د ڕێیا بلۆگا فەرمی یا فەیسبووکێ دا. تێدا پشتڕاست کر کو دێ هشیاری ل سەر ناڤەڕۆکا نەدروست یا هاتیە بەڵاڤکرن هێتە دان د ناڤبەرەکێ دا کو شیرەتێ ل بکارهێنەری دکەت سیاسەتێن پلاتفۆرمێ دووبارە بخوینیت، و پشتڕاست بکەت کو وی تێگەهشتیە بەری کو پۆست ژ هەژمارا بکارهێنەری بهێتە ژێبرن.
ئەڤ شێوازە وەک ئەوە کو بکارهێنەر بۆ خولەکا فێرکرنێ بهێتە ڕێڤەبرن دا سیاسەتێن پلاتفۆرمێ تێبگەهیت دەمێ ناڤەڕۆکەکا نەدروست بەڵاڤ دکەت. هندەک پرسیار ل سەر وێ سیاسەتا کو د پۆستا مەبەست دا هاتیە بنپێکرن دهێنە ئاراستەکرن. پشتی تەمامکرنا بەرسڤێن دروست، سزا دهێتە ڕاکرن و تەنها ژێبرنا پۆستێ دهێتە پشتڕاستکرن.
بەرێ، فەیسبووکێ سزا ل سەر وان بکارهێنەران دسەپاند یێن کو یاسایێن وێ دشکاندن، ژ وان ژی کێمکرنا شیانا وان یا بەڵاڤکرن و کارلێککرنێ ل سەر پلاتفۆرمێ بۆ دەمەکی. سالا بووری، کۆمپانیێ گوهۆڕین پێشکێش کرن کو پتر هشیاری ددانە بکارهێنەران بەری کو گاڤێن سزایی بهێنە هاڤێتن، و نووکە ژێبرنا وان هشیاریێن دەستپێکێ ژی گونجایە.
ئەڤ بژاردە دێ بەری هەر تشتی بۆ چێکەرێن ناڤەڕۆکێ یێن پیشەیی بهێتە پێشکێشکرن، یێن کو دێ ئاگەهداریەکێ د ناڤ ئەپلیکەیشنێ دا وەرگرن کو ئاماژێ ددەتە ڕاهێنانا فێرکرنێ یا کو جەخت ل سەر وێ سیاسەتێ دکەت یا کو وان بنپێ کریە. هەر کو هشیاری هاتە ژێبرن، چێکەرێ ناڤەڕۆکێ دشێت ڤەگەڕیتە بکارئینانا هەژمارا خۆ ب تەمامی ئەگەر چ بنپێکرنێن دی بۆ ماوێ سالەکێ نەکر.
ئەگەر جارەکا دی د ناڤ سالەکێ دا سیاسەت بنپێ کر، دێ هشیاریەکێ وەرگریت کو نەیێ ژێبرنێ یە. کۆمبوونا هشیاری و بنپێکرنان دبیتە ئەگەرێ سزایێن وەک کێمکرنا گەهشتنێ و دانانا سنووران بۆ دەرفەتێن قازانجکرنێ، و بەلکی ژێبرنا هەژماران ب تەمامی د هندەک حالەتان دا.
ئەڤ گوهۆڕین ئارمانج ژێ ئەوە کو فەیسبووک پتر پەیوەندیدار بیت دگەل چێکەرێن ناڤەڕۆکێ یێن نوو، کو دێ هاریکاریێ کەت د باشترکرنا وەکهەڤیا دەرفەتان دا و پلاتفۆرمێ پتر ڕاکێشانە بکەت بۆ چێکەرێن ناڤەڕۆکێ ب گشتی.
مێتا تەئکید دکەت کو پیڤەرێن جڤاکی یێن گرنگتر، وەک ناڤەڕۆکا کو “چەوساندنا سێکسی، فرۆتنا دەرمانێن گەلەک مەترسیدار، یان پەسنکرنا ڕێکخراو و کەسێن مەترسیدار” تێدا هەبیت، دێ نەشێن هشیاریان ژێببەن ب گۆر ڤێ سیستەما نوو، و سزا دێ ڕاستەوخۆ هێنە سەپاندن.