سه‌ما
ميدیایه‌كا ئیرانی دەمێ سەردانا مەسعوود پزیشكیان سەرۆكێ كۆمارێ ئیرانێ بۆ بەغدا پایتەختا عیراقێ ئاشكرا كر.
ئاژانسا (ئەخبار عاجلە) ژ دەڤێ بەرپرسەكێ ئیرانی ڤەگوهاست: مەسعوود پزیشكیان د داویا هەیڤا ئەیلوولا بێت دێ سەره‌دانا بەغدا كەت.
هەروەسا گۆت: ئەڤ سەره‌دانە بۆ بەغدا، یا ئێكێ یە كو پزیشكیان دێ كەتە دەرڤەی ئیرانێ پشتی وەرگرتنا پۆستێ سەرۆك كۆمار د تیرمەها بۆری دا.
دیسان گۆت: پشتی سەره‌دانا بەغدا، سەرۆكێ كۆمارێ ئیرانێ دێ چتە نیۆیۆركێ دا بەشداریێ د كۆمبوونێن كۆمەڵا گشتی یا نەتەوەیێن ئێكگرتی دا بكەت.
ل گۆر زانیاریێن ميدیایێ، د ڤێ سەره‌دانێ دا هەر ئێك ژ وەزیرێن دەرڤە و ناڤخۆ و نەفت و ئاكنجیكرنێ و پارێزڤانێ بانكا ناڤەندی یا ئیرانێ، دێ دگەل پزیشكیان بن بۆ بەغدا.
هەیڤا بۆری محەمەد شیاع سوودانی سەرۆك وەزیرێ عیراقێ ب فەرمی داخوازنامه‌يه‌ك ئاراستەی مەسعوود پزیشكیان كربوو بۆ سەره‌دانكرنا بەغدا پشتی رێورەسما سوندخوارنێ و دەست ب كاربوونا وی وەك سەرۆكێ كۆمارێ ئیرانێ.