سه‌ما
سه‌رۆكێ ده‌زگه‌ها ستراتیژی بۆ مافێن مرۆڤی ل عیراقێ دووپات كر، ب شێوه‌یه‌كێ مه‌ترسیدار توندوتیژیا خێزانى ل عیراقێ بلندوویه، ب شێوه‌یه‌ك ل سه‌رانسه‌ر وه‌لاتی د ماوێ سێ سالان دا، زێده‌تر ژ 53 هه‌زار حاله‌تان هاتینه تۆماركرن.
مالپه‌رێ “شه‌فه‌ق نیوز” ئيرۆ شه‌مبوويێ 31ێ ته‌باخێ به‌لاڤكریه، فازل غه‌راوی، سه‌رۆكێ ده‌زگه‌هێ ستراتیژی بۆ مافێن مرۆڤی ل عیراقێ دووپات كریه، توندوتیژیا خێزانى ل عیراقێ ب شێوه‌یه‌كێ مه‌ترسیدار گه‌له‌ك بلندبوویه، ته‌نێ د سێ سالێن بۆری دا هه‌تا شه‌ش هه‌یڤێن ئێكێ یێن 2024ێ، 53 هه‌زار و 889 حاله‌ت هاتینه تۆماركرن.
غه‌راوی زێده‌تر گۆت: تنێ د شه‌ش هه‌یڤێن ئێكێ یێن ئيساله 2024ێ، ژماره‌یا سكاله‌یێن تۆماركری گه‌هشته 13 هه‌زار و 857 حاله‌تان. د سالا 2023ێ دا گه‌هشتبوو 18 هه‌زار و 436 حاله‌تان، د سالا 2022ێ دا ژی گه‌هشته 21 هه‌زار و 595 حاله‌تان.
ده‌رباره‌ی جۆرێن توندوتیژیان غه‌راوی گۆت: د ماوێ وان سێ سالان دا پرانیا توندوتیژیان ده‌ستدرێژیا زه‌لامی بۆ سه‌ر هه‌ڤژینا خۆ بوویه ب رێژه‌یا 75%، ده‌ستدرێژیا ژنێ ژی بۆ سه‌ر هه‌ڤژینێ خۆ گه‌هشتیه 17%، هه‌روه‌سا ده‌ستدرێژیا باب و دایكێ بۆ سه‌ر زارۆكێن خۆ رێژه‌یا وێ 6% بوویه، ده‌ستدرێژیا ل سه‌ر پیر و كالان ژی رێژه‌یا وێ 2% بوویه.
ده‌رباره‌ی ئه‌گه‌ران ژی غه‌راوی گۆت: ئه‌گه‌رێن توندوتیژیا خێزانى ل عیراقێ پێكهاتینه ژ كێمیا ره‌وشه‌نبیریا خێزانێ، پرانیا كێشه‌یێن خێزانان په‌يوه‌ندیا وان ب خرابیا ئاستێ ره‌وشا دارایی ڤه هه‌یه، هه‌روه‌سا گۆتارێن ئاینی ژی ئه‌گه‌ره‌كێ دینه، بكارئینانا خراب یا په‌يوه‌ندی و تۆرێن جڤاكی ژی ئێك ژ ئه‌گه‌رانه، پاشی ژی خیانه‌تا مالباتی و دگه‌ل وێ بكارئینانا ماده‌یێن هشبه‌ر.