سه‌ما
ئيرۆ چارشەمبوويێ 25ێ ئیلۆنێ، مەسرور بارزانی، سەرۆکێ حکومەتا هەرێما کوردستانێ، زەنگا دەستپێکرنا سالا نوو یا خواندنێ 2024-2025 ل قوتابخانا نەجیبە خانا جەلیزادە ل باژێرێ کۆیێ لێدا.
سەرۆکێ حکومەتێ، د گۆتارەکێ دا سوپاسیا مامۆستایان کر کو هەمی دەم د رێزێن پێشین یێن خزمەتکرنا گەل و وەلاتێ مە دا بوون، ب وێ یەکێ کو نفشەکێ نوی پەروەردە دکەن.
ئەڤە ژی دەقێ گۆتارا وی یە:
ب ناڤێ خودایێ مەزن و دلۆڤان
قوتابیێن خۆشتڤی، مامۆستایێن بەرێز، سپێدە باش
دەستپێکا سالا نوو یا خواندنێ ل هەموو قوتابیێن خۆشتڤی پیرۆز دکەم و سوپاسیا مامۆستایێن بەرێز دکەم کو هەموو دەمان د رێزێن پێشین یێن خزمەتکرنا گەل و وەلاتێ مە دا بوون، ب وێ یەکێ کو نفشەکێ نوی پەروەردە دکەن. هیڤیدارم ئەڤ سال ببیتە سالا ئارامی و سەرکەفتن و خۆشیێ بۆ هەمی قوتابیان و ژ نوکە ڤە ئارەزوویا سەرکەفتنێ بۆ هەمی قوتابیێن خۆشتڤی ل ڤێ قوتابخانێ و ل سەرانسەری کوردستانێ دکەم.
گەلەک کەیفخۆش م کو نوکە سەرەدانا ڤێ قوتابخانێ دکەم کو ب ناڤێ قوتابخانا (نەجیبە خانا جەلیزادە) هاتیە ڤەکرن کو کچا مامۆستایێ مەزن مەلایێ مەزنێ کۆیێ یە، کو بەری 100 سالان وەک یەکەم کچ بۆ قوتابخانەکا تێکەل هاتە هنارتن، کو د وی سەردەمی دا بابەتێ جوداهیا رەگەزی نە تەنێ ل کوردستانێ، ل سەر ئاستێ جیهانێ ژی تشتەکێ گەلەک دیار بوو، لێ ب هنارتنا نەجیبە خانێ بۆ قوتابخانا تێکەل، سەردەمەکێ نوی دەست پێ کر. ئەڤە ژی نیشانا وێ یەکێ یە کو کۆیە هەر ژ دەمێن کەڤن ڤە ناڤەندا زانست و مەعریفە و هونەر و هەلبەست و تێگەهشتن و جهێ پێشکەفتنێ بوویە و خەلکێن گەلەک زانا و مەزن ژێ دەرکەفتینە. گەلەک کەیفخۆش م کو ئەڤرۆ دگەل وە مە و ل ڤێرە زەنگێ دەستپێکرنا قوتابخانێ لێ ددەین. ب ڤێ بۆنەیێ پێ خۆش ە بیرا هەمی لایەکی بینم کو ئەڤرۆ رۆژا پیرۆزا رێفراندۆمێ ژی یە، هەر ب ڤێ بۆنەیێ دەستخۆشیا ڤێ رۆژا پیرۆز و دیرۆکی ل هەمی خەلکێ کوردستانێ دکەم.
مە چەندین مزگینی ژی هەنە بۆ خەلکێ کۆیێ و دەڤەرا وێ، ئێک ژ وان مزگینیان ئەو ە کو د چەند رۆژێن داهاتی دا دێ دەست ب چێکرنا جووت لایێن رێکا هەولێر – کۆیێ کەین، کو ئەڤە خواستەکا کەڤن یا خەلکێ کۆیێ بوو، دزانم ژ 2012ان ڤە هەول هاتیە دان و بەرێ بنگەهێ بۆ ڤێ رێکێ هاتیە دانان، لێ ب ئەگەرێن جودا هەتا نوکە ئەڤ پرۆژە نەهاتیە جێبەجێکرن، هیڤیدارم د چەند رۆژێن داهاتی دا دەست ب ئەنجامدان و تەمامکرنا ڤێ پرۆژێ بکەین. هەروەسا مزگینیەکا دی ژی هەیە کو ئەو ژی مە بریار دایە بۆ قەزاکرنا ناحیا تەقتەقێ وەک ئێک ژ کەڤنترین ناحیێن کوردستانێ، کو ئەڤە ژی دێ بیتە هاریکارەکێ مەزن بۆ خەلکێ دەڤەرێ و بارگرانیا کارگێری ل سەر باژێرێ کۆیێ دێ کێم بیت و تایبەتمەندیەکا زێدەتر دێ هێتە دان ب تەقتەقێ. هیڤیدارم ئەو ژی دیسان بکەڤیتە خزمەتا هەمی هەڤوەلاتیێن کوردستانێ، ب تایبەت خەلکێ کۆیێ و تەقتەقێ.
نە ڤەشارتی یە کو ئەڤرۆ رۆژا دەستپێکرنا بانگەشا هەلبژارتنێ یە، ئەڤە ژی رۆژەکا دیرۆکی یە بۆ هەرێما کوردستانێ و هەمی خەلکێ کوردستانێ، هەر ژ ڤێرە ئەز داخوازێ ژ هەمی لایەنان دکەم کو بانگەشەکا ئارام و شارستانی دەست پێ بکەن و هەمی لایەک رەچاڤا وێ یەکێ بکەن کو بەرژەوەندیا بلند یا وەلاتێ مە د سەر هەمی بەرژەوەندیێن دی را بیت و هەروەسا سەرکەفتنا هەلبژارتنێ و دەستنیشانکرنا نوێنەران بۆ وێ یەکێ بن کو زێدەتر خزمەتا گەل و وەلاتێ مە بکەن و هەمی ماف و مافێن خەلکێ مە دەستەبەر بکەن.
ئەز جارەکا دی سوپاسیا وە یێن خۆشتڤی دکەم و هیڤیدارم هوون هەمی سەرکەفتی بن. دڤێت ئەز وێ گۆتنێ ژی بکەم د هاتنا خۆ یا ژۆرڤە دا قوتابیەکێ گەلەک خۆشتڤی پێشوازی ل من کر و گەلەک سەرسام بووم ب شیانا وی یا د ئاخفتن و هزرکرنێ دا، دەستخۆشیێ ل مامۆستایان دکەم کو کاریبوون قوتابیێن وەها پەروەردە بکەن.
جارەکا دی دەستخۆشیێ ل وە دکەم و ئینشائەللا هوون دێ هەر سەرکەفتی بن.