سه‌ما
دووشه‌مبوويێ، 07-10-2024، مه‌سرور بارزانی، سه‌رۆكێ حكومه‌تا هه‌رێما كوردستانێ، پرۆژێ “كاڤین فارم” ڤه‌كر كو تایبه‌ته ب خودانكرنا چێلان و به‌رهه‌مئینانا ماست و شیر و په‌نيری.
سه‌رۆك وه‌زیرێ هه‌رێما كوردستانێ د گۆتاره‌كێ دا گۆت: “جهێ ده‌ستخۆشی و شانازیێ یه كو پرۆژێن وه‌ها ل سه‌ر ئاستێ هه‌رێما كوردستانێ دهێنه جێ به‌جێ كرن و ئێك ژ پرۆژێن ستراتیژی یه كو ل ده‌ڤه‌را سێمێلێ هاتیه جێ به‌جێ كرن. نه ته‌نێ ده‌ڤه‌را سێمێلێ، به‌لكو پارێزگه‌ها دهۆكێ و پارێزگه‌هێن دی یێن هه‌رێما كوردستانێ ژی دێ سوودێ ژ ڤێ پرۆژێ وه‌رگرن”.
پرۆژه، وه‌ك سه‌رۆكێ حكومه‌تێ به‌حس كری: “دێ كاریگه‌ریه‌كا ئه‌رێنی ل سه‌ر پێشخستنا ئابۆریا هه‌رێما كوردستانێ هه‌بیت و سه‌دان ده‌رفه‌تێن كاری بۆ هه‌ڤوه‌لاتیێن ده‌ڤه‌را سێمێلێ دێ پێكئینیت”. هه‌روه‌سا گۆت: “پێشخستنا كه‌رتێ چاندنێ، گاڤه‌كا ئه‌رێنی یه بۆ پێشخستنا كه‌رتێن دی ب ئارمانجا پر جۆر كرنا ژێده‌رێن داهاتی”.
مه‌سرور بارزانی دوپاتكر: “دابینكرنا خوارنێ بۆ وه‌لاتیێن هه‌رێما كوردستانێ ئێك ژ ئارمانجێن مه یێن سه‌ره‌كی یه؛ پاراستنا ئاسایشا خوارنێ بۆ هه‌ر وه‌لات و نه‌ته‌وه‌یه‌كێ، تشته‌كێ گه‌له‌ك پێدڤی یه، كێفخوه‌ش دبم كو دبینم ل هه‌رێما كوردستانێ گاڤان بۆ وێ ئارمانجێ داڤێژین”.
سه‌رۆكێ حكومه‌تێ به‌حسێ وێ ژی كر: “خودێ پشته‌ڤان بیت د به‌رنامه‌یا مه دا هه‌یه كو د داهاتی دا گرنگیه‌كا پتر ب كه‌رتێ پیشه‌سازیێ ل هه‌رێما كوردستانێ بده‌ین كو ب دلنیایی پێشخستنا وی كه‌رتی، دێ سه‌دان ده‌رفه‌تێن كاری بۆ گه‌نجان پێكئینیت”.
مه‌سرور بارزانی ده‌رباره‌ی بازاركرنا به‌رهه‌مێ جۆتیاران، ئاماژه دا كو “د ده‌مێ بۆری دا مه گه‌له‌ك هه‌ول دایه كوردستان ب بازارا جیهانی ڤه بهێته گرێدان ب وێ ئارمانجێ كو ده‌رگه‌ه ل به‌ر هناردنا به‌رهه‌مێ جۆتیارێن مه بۆ ده‌رڤه‌ی وه‌لاتی ڤه‌كه‌ین، هه‌تا راده‌یه‌كێ مه‌زن ژی مه سه‌ركه‌فتن بده‌ست خۆڤه ئینایه و هه‌تا نها چه‌ندین به‌رهه‌مێن جۆتیاران هاتینه هناردن بۆ وه‌لاتێن كه‌نداڤێ و جیهانێ”.
سه‌رۆكێ حكومه‌تێ دبینیت كو هنارتنا به‌رهه‌مێ ناڤخۆیی یێ جۆتیاران بۆ ده‌رڤه “دێ گه‌له‌ك هاریكار بیت بۆ رێكخستنا بابه‌تێ بازرگانیێ دگه‌ل وان وه‌لاتێن كو هه‌رێما كوردستانێ په‌یوه‌ندیێن ئابۆری دگه‌ل وان هه‌نه؛ كێفخوه‌ش دبم كو دبینم پرۆژێن چاندنێ ئێك ل دویڤ ئێكێ دهێنه جێ به‌جێ كرن كو دلنیا مه كو كاریگه‌ریه‌كا مه‌زن ل سه‌ر بهێزكرنا ئابۆریا وه‌لاتێ مه دێ هه‌بیت”.