سه‌ما
رەوشا مافێن زارۆکان ل عیراقێ ب گشتی ژ رەوشا مافێن مرۆڤی جودا نابیت، ژبەر کو “پاشڤەچوونەکا مەترسیدار” د هەموو ڤان مافان دا هەیە، “د گەل بەردەوامیا ناکۆکیان و نەئارامیا ئەمنی و بەلاڤبوونا چەکی و نەبوونا سیستەمەکا یاسایی یا کو پاراستنێ بۆ وان دابین دکەت”، ل گۆر گۆتنا ڤەکۆلەرا جڤاکی، ئەمەل ئەلکەبایشی ب هەلکەفتا رۆژا جیهانی یا زارۆکان، یا کو جیهان د 20ێ تشرینا دووێ دا هەر سال پێ دئاهنگ دگریت.
کەبایشی، بۆ ئاژانسا شەفەق نیوز، دیار کر کو “بلندبوونا ئاستێن توندوتیژیێ ب شێوەیەکێ مەترسیدار دژی زارۆکان دیار و بەرچاڤ بوویە ژ رێیا وێ یا کو د تۆرێن جڤاکی دا دهێتە بەلاڤکرن و هەروەسا ئەو رێژێن دەستدرێژیێ یێن ل سەر زارۆکان دەردکەڤن. سەرەرای کو عیراق ژ سالان ڤە پرۆتۆکۆلا تایبەت ب رێککەفتنا زارۆکان پەسەند کریە و پابەند بوویە ب دابینکرنا ژینگەهەکا ئارام و ساخلەم بۆ هەمی زارۆکان، لێ هێشتا زارۆک ل عیراقێ رووبەرووی ئاستەنگان دبن د بدەستڤەئینانا ڤان مافان دا.”
دیار ژى کر کو “زارۆک رووبەرووی زێدەبوونا توندوتیژیێ و پاشڤەچوونا ئاستێن پەروەردێ دبن د گەل بلندبوونا رێژێن دەرکەتنا ژ دبستانان ژ ئەنجامێ وندابوونا گەلەک رێکێن کو زارۆکان هان ددەن بۆ بەردەوامیا خواندنێ ژ وان ئاڤاکرنا بنیاتێن بنگەهی و خزمەتگوزاریێن تەمام و یێن دی، سەرباری پاشڤەچوونێ ل سەر ئاستێن تەندروستیێ ژی.”
کەبایشی دوپاتكر کو “دڤێت حکومەتا عیراقێ پابەندیێن خۆ یێن کو پێ رابوویە ژ رێیا رێککەفتنا نێڤدەولەتی و ئەوێن کو د دەستوورێ عیراقی دا هاتینە دیارکرن دەربارەی مافێن زارۆکان جێبەجێ بکەت.” وێ ئاماژە دا کو “توندوتیژی ژ زێدەترین پێشێلکاریێن کو زارۆک تووشی دبن، و بەردەوام د زێدەبوونێ دایە ژ ئەنجامێ بەلاڤبوونا زارۆکی د ناڤبەرا مالباتا ژێکڤەبووی دا د گەل بلندبوونا رێژێن تەلاقێ کو ژینگەهەکا نەئارام و نە جێگیر بۆ وی پەیدا دکەت.”
جیهان د 20ێ تشرینا دووێ ژ هەر سالەکێ دا ب “رۆژا جیهانی یا زارۆکان” ئاهنگ دگریت، ئەڤە هەلکەفتەکا نێڤدەولەتی یە بۆ زێدەکرنا هشیاریێ دەربارەی مافێن زارۆکان و پاراستنا وان ل هەمی جیهانێ.