جاردی جیناتێن جوانیێ
ل جەژنا جەمایێ،
جاردی دەستێ برینێ گرتن و
برنە سەمایێ.
جاردی
لنگێن ژانێ گرێدان
بازنبار کرنە زەندکا ژینێ؛
دلۆڤانی بەردانە کەربوکینێ،
جاردی
تێری گێڕاندن
ل وەرزێ خەلایێ،
بەلێ و لەبێ شین کرن
لبەر دەرێ بەلایێ.
ژکنیاتا ئێشێ
پیرێ پەرییان
دەرمان دەرانی،
خەرقەیا خەیالێ
بەهوەر و بەرات؛
دلێ فەقیران کر ئاڤەدانی.
ئەڤ هەمی برینە
خوینا ئەنڕی
ژدەهمەنا هەوارێ ڤەدشۆن؛
بۆ دیتنا کەنیا کوبار
خوە دگەهیننە ئاڤانیا گرییێ،
لالش تێکدا بوویە
گەشچرایێن دل و سەران،
رەنگینە روو
بەنگینە جان؛
هلیلییا سۆر و زەران،
ئێدی جەمایە و
هۆلهۆلا رۆناهیێ؛
شریناهییا شەوق و شەمالان
دگەهینتە ئاسۆیێن دوور و ئاسێ.
مە مننەتە،
سوبحان ژناڤێ
رەببێ جەلیل؛
بێ موغدار وی کەیف و کەنی
بۆ بەلەنگازان دایە بەر داسێ.
کانیا سپی
شیرێ حەلال
بۆ جامێرییێ دمەهینیت،
هێ ێ ێ ێ ی فەلەکێ
ئەڤ هەمی شێلیبوونە
چەوا گیها زەنەکێن زەلال؛
خلمەت قەبول!
تە نەهێلا
ئەڤ هەمی ترارێن تاوی
وێنەیەکا تێهنیبونێ
بقەنتەرکا دلمانێڤە هلاویسن!.
رێ و رێبار
سترییێن شەڕا
ژچەکالێن شینێ دەرتینن،
هێ ێ ێ ێ ی فەلەکێ
ئەڤ هەمی رەڤ و رێڤینگی
چەوا هێڤێنێ ئولفەتێ رژاندن؛
خلمەت قەبول!
تە نەهێلا
ئەڤ هەمی نهۆماتێن
بڕەخ تەڤە بوورین؛
تەرمەکێ خوە بئەمانەت ژی
لبەر دیوارەکێ تە ڤەشێرن.
قوبلەت و شەمال
هێژیرێن کالبوونێ
لبەر پییێن
زارۆیێن کۆچۆ و شەنگالێ رادکەن؛
گویزێن گازندا دکەنە ناڤ
سەڤیکێن گرعوزێر و سیبا شێخدرێ.
هێ ێ ێ ێ ی فەلەکێ
ئەڤ هەمی پۆر و کەزییێن دانعەمر
چەوا دگەل داڤێن زێمارێ ڤەهاندن؛
خلمەت قەبول!
تە نەهێلا
مرارییێن مرنێ بکەنە رستۆک
بۆ حەفکا حەیفێ.
دایشەمێ؛
شەمایا دلێ ئێزدییان
ددەتە دلرەقییا دەهر و دەراڤان،
هێ ێ ێ ێ ی فەلەکێ
ئەڤ هەمی پرتیبوونا بەژنا شبابان
ئاگرێ نەفیر و نەوایان
بەردانە ئەلیف و بایان؛
خلمەت قەبول!
تە نەهێلا
سەبەقا نەرمییێ
بۆ نەمانا نەیارییێ
ب بە نۆژ و نەبات.
وەی پا ئاڤ
پێخاس مایە غەریبۆ؛
ئێدی دوڕا تەهارەتێ
ناگەهە قەسر و قۆناغێن قریارێ.
ئەڤ هەمی زوڕییەتا رۆژێ
چەوا چیڕۆکا
ڤێ درەنگییا تاری
بۆ کێر و کراسان ڤەگێڕن؟
ما تازە ئەز چبکەم
چ ژمن تێ غەریبۆ؟!
پێخاس و خوسار ئەزێ رابم
داو و دەلنگێ خوە هلگێڤم؛
لبەر دەرێ لالشێ
روونم هەوارکەم؛
ژهەر گۆتنەکێ
بلا حەرفا ژهەمیا بکێر تر
داکەڤە دانگا دنیایێ،
ژهەر دۆتنەکێ
بلا حیکمەتا ژهەمیا تێر تر
کەرەمکەت بهێتە رایێ،
ژهەر مستەکا ئاخێ
بلا چاڤێ ژهەمیا گری تر
بەیانکەت نیهارێ،
ژ هەر زنارەکا زولمێ
بلا ناڤێ ژهەمیا مری تر
بڕەجمینیت گەمارێ.
قیزێن بڕوومەت و رەنگ پەری
خۆرتێن بمروەت و مێرسەری
ئەوان خێر و خیرەت پاراست؛
مشوور و مەردینی پێکڤە
لسەرێ ژۆری ژۆری دانا،
ئەو دێ مینن
ژناڤ ناچن
ب چ فەتل و چ فەرمانا.
مەلکێ منۆ
حەدوسەد بنیشان و مۆرە؛
هەچیێ نەخش و نێتان خەرا ب کە
نەزان و کۆرە،
مراز و مان
قەر و قەدانە
لێ مەعریفەت نە بگەڕ و دۆرە.
مەلکێ من
دناڤ ڤێ دەرد و دومانێ
چ نایێ دیتن
ئەم چ نابینن.
مەلکێ منۆ
نەی رۆژە نەی شەڤە،
نە کەسێ مایە داڤ و
نەکەسێ دەڤە.
دێ بکە خاترا
هەمی ئەڤان سێڤ و گولان،
دێ بکە خاترا
هەمی ئەڤان دێم و دلان.
بکە خاترا
هەچیێ خاس و قەلەندەرە
هەچیێ سەرناس و مەهدەرە،
ئەڤە بەنی ئەڤە بانی
ما ژسڕێ کێ تشتەک زانی؟
مەلکێ من
ژئەووەل و ئاخر
مەلکێ من
ژباتن و زاهر،
مال و مەخلوقاتێن دەلال
چ کێمانییە چ کەمال،
ژتیر و تایێ
ژ فێم و فند و فەنایێ.
ژیر و ژاری
قەنجەواری
فەروارا سەرێ هەمیانە،
ژ ڤێ دۆتێ
ژ ڤێ دایێ،
ژ ئاخ و ئاڤان غولغولی
سنج و سمات؛
پەرواز ژ ئاگر و بایێ،
بەد و بەدیار
کولب و کەدەر
ئانینە دەر،
بهاتنا جەژنا جەمایێ
شێنی دەرکەت ژ ئیزایێ.
خنێکا پیر و فەقیران
خنێکا مرید و میران
دەرۆزێن دل و دەبارێ
مەلکەزەن ئینانە خوارێ؛
خەملاندن بەرێ شباکێ
بانگ و سەدایا کەبارێ،
خودان و خاسێ خلوەتێ
بۆ ئێغبال و ئاقیبەتێ؛
ل پیر و جوانان رازییە
شەکرە شرینە شاهییە،
ل ئەرد و ئەسمانان شیارە
تەبا و تفاقی تیمارە،
لهەر دەرێ بێهنا بخوورێ
تاری رەڤی ژناڤ و نوورێ،
قەپاغ و قوربانا قەدیم
مێدەکا ئەزدایێ کەریم.
مزگین مزگین
گەشڤەدا بووکا عەنزەلێ،
گەهشتە نیڤا دیوانێ؛
دای کابانی.
دفەیز و فەنەرێدا وەربوون
قوبێن لالشا نوورانی.
