ناڤهندا نووچهیان – سهما
ئیرۆ پێنجشەمبوویێ، رێکەفتی 19ی ئادارا 2026، ل بارەگایێ بنگەهێ لالش یێ رەوشەنبیری و کۆمەڵایەتی ل دهۆکێ، روونشتنەکا ڤەکری یا بەرفەرهـ ل ژێر ناڤونیشانێن (قوتابی و لاو وەک ستوونا راگرتنا جڤاکی د ناڤبەرا ئازادی و بەرپرسیارەتیێ دا) بۆ بەڕێز “سەعید جردۆ”، سەرۆکێ دەستەیا بلندا بنگەهێ لالش هاتە سازکرن.
ل دەسپێکا سمینارێ، ئامادەبووی ب خولەکەکێ بێ دەنگی بۆ گیانێ پاکێ شەهیدێن کوردستانێ و سەروەرێ وان بارزانیێ نەمر و کاک ئیدریسێ هەردەم ساخ سهكنین.
سەرۆکێ بنگەهێ لالش، ب هووری بەحسێ دیرۆکا دامەزراندنا ڤان رێکخراوان کر و گۆت: “ئەڤ رێکخراوە ل سەر دەستێ رێبەرێ نەتەوەیی بارزانیێ نەمر ل 18ی شواتا سالا 1953ێ هاتینە دامەزراندن، ئەڤە نیشانا وێ چەندێ بوو کو سەرکردایەتییا کوردستانی هەر ژ دەسپێکێ باوەری ب شیانێن گەنج و قوتابیان هەبوو وەک هێزەکا کاریگەر بۆ بزاڤا رزگاریخوازیا كوردستانێ.
زێدەتر گۆت: “قوتابی و لاو د سەردەمێ شۆرەشێ دا پارێزەرێن ئاخێ بوون، و ئیرۆ ژی د سەردەمێ ئاڤادانیێ دا، وان ئەرکەکێ گران ل سەر ملێن وانه کو پارێزگاریێ ل دەستکەفتێن مە دکەن.”
ناڤهاتی ب هەلکەفتا نێزیکبوونا جەژنا رەمەزانێ، پیرۆزباهی ل هەمی قوتابی و لاوان کر و هەروەسا، دەستخۆشی ل هەڤگرتن و هەماهنگییا د ناڤبەرا رێکخراوێن قوتابی و لاوان دا کر و ئەڤ پێنگاڤە ب سەرکەفتنەکا مەزن بۆ ئێکخستنا دەنگێ گەنجان ل هەرێما کوردستانێ دیاركر.
سهعید جردۆ بهحسێ گهنج و تهكنهلۆژیایێ ژی كر و گۆت: “ئازادی بێ بەرپرسیارەتی دبتە فەوزا، پێدڤییه گەنجێن مە د هشیار بن کو چەوا هاوسەنگیێ د ناڤبەرا مافێن خۆ و ئەرکێن خۆ یێن نەتەوەیی دا دروست بکەن.
هەروەسا هۆشداری دا ل سەر بکارئینانا نەرینی یا سۆشیال میدیایێ و گۆت: “نەهێلن پۆستێن نەرینی و تۆرێن جڤاکی كارتێكرنێ ل وه بكهن، بەلکو پێدڤییه هوون بن یێن کو هزرێن ساخلەم د جڤاکی دا بەلاڤ دکەن.”
د دویماهییا سمینارێ دا، دەرگەهێ گەنگەشێ هاتە ڤەکرن و ئامادەبوویان ب تێبینی و پێشنیارێن خۆ بابەت دەولەمەندتر کر.
