ناڤەندا نووچەیان – سەما
براهیم حسێن، گەنجەکێ خودان شیان و دەرچوویێ پشکا دەروونی ل زانکۆیا دهۆکێ یە، سەرەرای کارێ خۆ یێ فەرمی وەک ڤهكۆلهرێ جڤاکی، بڕیار دا پڕۆژەیەکێ جودا و نووی ل لۆفێن چیایێ شنگالێ ئەنجام بدەت، ئەڤ گەنجە کو خەلکێ گوندێ “گرزەرگ”ە، ژبهركو چیایێ شنگال گهلهك “گەلی و بانی” لێ ههینه پرۆژهیێ خۆ یێ گەشتیاری ب ناڤێ “بانی” بناڤ كرییه، کو ئارمانج ژێ خزمەتکرنا گەشتیاران و زیندووکرنا دەڤەرێ یە.
براهیم د چوارچۆڤەیێ دیمانەکێ دا بۆ “سەما” دیار کر کو پەیاما وی بۆ گەنجان ئەوە: “هەر کەسەک بلا ل دووڤ وێ هزرێ بچت ئەوا خۆ تێدا دبینیت، و ئەو باوەر دکەت کو هەکە مرۆڤ حەز ژ کارێ خۆ بکەت، چ جاران هەست ماندیبوونێ ناکەت، چ ئەو کار خودانکرنا تەیران بت یان هەر کارەکێ دی یێ دەستی و بازرگانی.
خزمەتگوزاریێن “بانی” ئەڤ پڕۆژە نەک بتنێ جهەکێ بێهنڤەدانێ یە، بەلکو کۆمەکا خزمەتگوزاریێن جودا پێشکێشی سەرەدانکەرێن چیایێ شنگالێ دکەت، ژ وان ژی پێشکێشکرنا چایا سەر ئاگری، قەهوە، و خوارنێن سادە وەک نیسک و پاقلان، دابینکرنا پێدڤیێن گەشتێ (سەفەریات) وەک کورسی، مێز، و کەرەستێن برژاندنا گۆشتی، دابینکرنا پێدڤیێن سەرەکی یێن گەشتیاران وەک زەیت، خوی و شەکرێ.
ناڤبری ئاماژە ب هندێ ژی کر کو ئەو پلان دکەن د پاشەڕۆژێ دا کارێ خۆ بەرفرەهتر لێ بکەن و پشکا “مەشویات” و خوارنێن برشتی ل ناڤ پڕۆژەی زێدە بکەن، ئەو هیڤی خوازە ئەڤ پێنگاڤە ببتە پالدەرەک بۆ گەنجێن دی یێن شنگالێ دا کو ب ئیرادەیەکا بهێز کار بۆ ئاڤەدانکرنا دەڤەرا خۆ بکەن.