شنگال – Sama TV
ل قەزا شنگالێ قهیرانهكا دژوار یا کێمبوونا غازا مالان سهرههلدایه و ب وێ ئەگەرێ ژى سرایێن درێژ یێن وەلاتیان ل جهم بنگهیێن دابهشكرنا غازێ دروستبووینه، ئهڤ یهک بوویه ئەگەرێ دلگرانیا خهلكێ دهڤهرێ کو ب دهمژمێران ل هیڤیا قنینهکێ غازێ دمینن.
ل گۆرهى زانیاریێن مهیدانی، وهلاتیێن شنگالێ ناچارن رۆژانه ژ 4 ههتا 6 دهمژمێران د سرایێ دا بمینن داکو بكارن تنێ ئێك قنینا غازا مالان ب دهستخۆڤه بینن، ئهڤ رهوشه ل ناڤهندا قهزایێ و كۆمهلگههێن دهوروبهر ب شێوهیهكێ بهرچاڤ دهێته دیتن و بارگرانیهكا مهزن ئێخستیه سهر ملێ وەلاتیان.
وهلاتیێن دهڤهرێ د ڕێكا مهیدیایێ ڕا گله و گازندێن خۆ دگههینن و داخوازێ ل ئالیێن پهیوهندیدار و لایهنێن ئیداری یێن قهزایێ دكهن كو ب زووترین دهم چارهسهریهكێ بۆ ڤێ كێشێ ببینن، ئهو دبێژن كو كێمبوونا پشكا غازێ یا شنگالێ و زێدهبوونا خواستێ، ئەگەرێن سەرەکى یێن ڤێ قەیرانێ نە.
وێنهیێن كو ژ لایێ (حهمید بهرهكات) ڤه بۆ “سهما تیڤی” هاتینه هنارتن، ب ئاشكهرایی نیشا ددهن كا چهوا خهلك ل بهردهم بارههلگرێن غازێ كۆمبووینه و سرایێن درێژ دروستكرینه، كو ئهڤه ژى نیشانا دژواریا كێشێ یە ل دەڤەرێ.
