ناڤه‌ندا نووچه‌یان – سه‌ما

ب هەلکەفتا ٣٥ سالیادا سەرهلدانا جەماوەری یا ده‌ڤه‌را به‌هدینان و باژێرێ دهۆكێ، بنگەهێ لالش یێ ڕەوشەنبیری و کۆمەلایەتی، گەرمترین پیرۆزباهیان ئاراستەی خەلکێ کوردستانێ ب گشتی و دەڤەرا به‌هدینان ب تایبەتی دکەت.

ل ٥ی ئادارا ١٩٩١ێ، یەکەم چریسکا سەرهلدانێ ل باژێرێ ڕانیە دەستپێکر و پێلێن وێ هەموو کوردستان ڤەگرت، ل ١٣ و ١٤ی ئادارێ، ب ڕێبەرایەتیا سەرۆک مەسعود بارزانی و ب پشکداریا هێزا پێشمەرگەیێ قەهرەمان و هەموو تەخ و توێژ و پێکهاتێن کوردستانێ، باژێرێ دهۆک و زاخۆ و هەموو دەڤەرا به‌هدینان ژ زولم و ستەما ڕژێما بەعس هاتنە ڕزگارکرن.

ئەڤ سەرهلدانە وەرچەرخانەکا دیرۆکی بوو د ئیرادە و تێکۆشینا گەلێ مە دا، کو ل سەر بنەمایێ ڕەتکرنا ژێردەستیێ و ب دەستڤەئینانا ئازادیێ هاتە ئەنجامدان، ئیڕۆ ئەڤ قەوارە و ئازادیا ئەم تێدا دژین، بەرهەمێ خوینا شەهیدان و خەباتا سالان یا بەرەیێ کوردستانی و ڕێبازا بارزانیێ نەمرە، هەر وەک چەوا پشتی سەرکەفتنا سەرهلدانێ، سەرۆک بارزانی بنیاتێ دیموکراسیێ دارشت و داخوازا هەلبژارتنان کر، داکو مللەت ببتە خودان پەرلەمان و حکومەت ل ژێر سێبەرا ئالایێ پیرۆزێ کوردستانێ.

د ڤێ قۆناغێ دا، کو پلانێن مەزن ل دژی دەستکەفتێن مە هەنە، ژ هەر دەمەکی پتر ئەم پێدڤی ب ئێکڕێزی و ئێکدەنگیا ناڤخۆیی نە. ئەرکێ مە هەموویانە پاراستنا دەستکەفتێن سەرهلدانێ ب ئەرکەکێ نشتیمانی بزانین.

هزار سلاڤ ل گیانێ پاکێ شەهیدێن سەرهلدانێ و هەموو شەهیدێن ڕێیا ئازادیێ، ل سەروەرێ شەهیدان بارزانیێ نەمر و کاک ئیدریسێ هەردەم ساخ.