ناڤهندا نووچهيان – سهما
عەلی زەیدی، سەرۆكوەزیرێن عیراقێ و تۆم باراك، هنارتییێ تایبەتێ سەرۆكێ ئەمریكا كۆمبوون، ڕاگەهاندنەكا هەڤپشك ل دوور ئەنجامێن كۆمبوونێ بەلاڤكر.
د ڕاگەهاندنێدا هاتییە، د كۆمبوونێدا باراكی پێداگیرییا ئیدارەیا ترەمپی بۆ هەڤپەشكییەكا ب هێز و دوولایانە دگەل عیراقێ دووپاتكر، هەڤدەم گازییا دۆنالد ترەمپی گەهاندە عەلی زەیدی بۆ سەرەدانكرنا كۆچكا سپی ل ناڤەڕاستا هەیڤا تەمموزێ، ب مەرەما دانوستاندكرنێ ل سەر پاشەرۆژا پەیوەندییێن دناڤبەرا هەردوو وەلاتاندا.
دانانا چەكی و هەلوەشاندنا گرۆپێن چەكدار:
ل دووڤ ڕاگەهاندنا هەڤپشك، سەرۆكوەزیرێن عیراقێ و هنارتییێ هەڤپشك، دیتنەكا هەڤپشك بۆ دانانا بنیاتەكی بۆ پاشەرۆژەكا گەشتر و دوور ژ تیرۆرێ هەبوو.
هەردوو لایان دووپاتی ل گرنگییا بجهئینانا پلانێن عیراقێ بۆ دامالینا تمام یا چەكی و هەلوەشاندنا هەموو گرۆپ و پێكهاتەیێن چەكدار یێن ژ دەرڤەی كونترۆل و دەستهەلاتا دەولەتێ، ب مەرەما سنوورداركرنا چەكی ب تنێ ب دەستێن دەستهەلاتا عیراقێدا.
هاتنا ستارلینك و شیڤرۆن بۆ عیراقێ:
د كەرتێ ئابووری و وەبەرهێنانێدا، هەردوو لایەنان پەسنا بریارا عیراقێ كر بۆ پێدانا مۆلەتا كاركرنێ ب كۆمپانییا ستارلینك ( Starlink ) بۆ دابینكرنا خزمەتگوزارییا ئینتەرنێتا جیهانییا پیشەنگ بۆ بكارهێنەرێن عیراقێ.
هەروەسا دانوستاندن دگەل كۆمپانییا شیڤرۆن بۆ گەشەپێدانا زەڤییێن پەترۆلێ یێن قورنە یا ڕۆژئاڤا و ناسریە دێ دەستپێكەت كو ب شێوەیەكی دبەرژەوەندییا هەردوو لایەناندا بیت، بریار هاتە دان ڕێ ب كۆمپانییێن ئەمریكی ) HKN )، (Western Zagros ) وHunt) ) بهێتە دان كارێن خۆ ب گەرەنتییا تمام یا ئەمنی ل عیراقێ دەستپێبكەن.
پرۆژەیێن ستراتیجی یێن هنارتنا پەترۆلێ و گازا شل
هەردوو لایەن دێ كار بۆ پێشخستنا یاداشتەكا لێكتێگەهشتنێ دگەل كۆمپانییا (TI Capital) بۆ كاراكرن و چاككرنا هێلا بۆرییا پەترۆلا( كەركووك – بانیاس ) وەكو ڕێیەكا ستراتیجییا هنارتنا پەترۆلێ.
د كەرتێ كارەبێ ژیدا كۆمپانییێن هەردوو لایان دێ كار بۆ زێدەكرنا هاریكارییا بازرگانی بۆ پركرنا پێدڤییێن كارەبا عیراقێ كەن، ئەوژی ب ڕێیا پرۆژەیێ كۆمپانییا ( Excelerate Energy ) بۆ گەشەپێدانا وێستگەهەكا ئێكگرتی یا هنارتنا گازا سرۆشتییا شل ( LNG ) ل بەندەرێ خۆر زوبێر.
ل دووماهییێ عەلی زەیدی و تۆم باراكی دووپاتی ل گرنگییا پشتەڤانیكرنا عیراقەكا فیدرال، دیمۆكراسی و ئێكگرتی كر، كو ل سەر بنەمایێ دامەزراوەیێن دەستووری یێن ب هێز بنیات بۆ بهێتە دانان، یەكسانییا تمام بۆ هەموو وەلاتییان دابین بكەت ب شێوازەكی كو ئێك ڕێزی، سەقامگێری و خۆشگوزەرانییا وەلاتی ب هێزتر لێ بكەت.