ناڤهندا نووچهیان – سهما
د دووازدهمین سالڤهگهرا جێنۆسایدا ئێزدیان دا، میر حازم تهحسین بهگ، میرێ ئێزدیان دیار كر كو پشتى 12 سالان هێش برینێن وان ساڕێژ نهبووینه و داخواز ژ حكومهتا عێراقێ كر ياسایا رزگاربوویان بجهـ بینت و سندوقا ئاڤاكرنا شنگالێ كارا بكهت دا كو ئاواره ب كهرامهت بزڤرن.
ئیرۆ دوشهمبێ، 3ی تهباخا 2026ێ، د رێوڕهسما سالڤهگهرا جێنۆسایدا ئێزدیان دا، میر حازم بهگ، میرێ ئێزدیان گوتارهك پێشكێش كر و راگههاند: “ئیرۆ ١٢ سال ب سهر قركرنا مللهتێ ئێزدى دا دبۆرن؛ ١٢ سالێن پڕ ژ نهخۆشى، خهم و بێئۆمێدیێ.” ئاماژه ب وێ چهندێ ژى كر كو ساخكرنا ڤێ بیرهاتنێ ژ لایێ حكومهتا ههرێما كوردستانێ ڤه جهێ شانازیێ یه و وهفاداریهكا مهزنه بۆ شههیدێن ئێزدییان و تهڤایا كوردستانێ.
میرێ ئێزدیان تیشك ئێخسته سهر بهردهوامییا كۆمەلكۆژیێ و گۆت: “ههتا نهۆ ٢٧٠ ههزار ئێزدى ئاوارهن و ٢٥٠٠ كچ و ژنێن ئێزدى د دهستێن تیرۆرستێن داعشێ دا ماینه، سهربارى كو گهلهك ژ گۆڕێن ب كۆم هێش نههاتینه ڤهكرن.
دیار ژى كر كو رێكخراوا تیرۆریستى یا داعشێ د چەرخێ ٢١ێ دا دڤییا دیرۆكا چوار ههزار سالییا مللهتێ ئێزدى ب شهڤ و رۆژهكێ ژ ناڤ ببهت، لێ ب پشتهڤانییا خودایێ مهزن و خۆراگرییا گهلێ مه پیلانا تیرۆرستان شكهستن ئینا.
د پشكهكا دى یا ئاخفتنا خۆ دا، میر حازم بهگ داخواز ژ سهرۆكێ حكومهتا ههرێما كوردستانێ و سهرۆكێ ههرێما كوردستانێ كر كو ل گهل حكومهتا عێراقێ بگههنه لێكتێگههشتنهكێ بۆ چارهسهركرنا دۆسیهیا شنگالێ، چونكى ئارامیا شنگالێ بۆ ئێزدیان و تهڤایا عێراقێ و ههرێما كوردستانێ گرنگیهكا ستراتیژى یا ههی.
سهبارهت ب جێنۆساید ناسكرنا كۆمكووژییا ئێزدییان ب جێنۆساید ل سهر ئاستێ نێڤدهولهتى، ئاماژه ب وێ چهندێ كر كو ههتا نهۆ 13 وهلاتان دانپێدان ب جێنۆسایدا ئێزدیان كرییه ههتا نهۆ عێراقێ دان پێدان نهكرییه، داخوازیێن میرێ ئێزدییان بۆ بهغدا پێكهاتبوون ژ چارهسهركرنا دۆسیهیا پهنابهران، بهردهوامییا بزاڤان بۆ رزگاركرنا رهڤاندییان، بجهـئینانا یاسایا ژنێن رزگاربوویێن ئێزدی، دانانا ئیدارهیهكا شهرعى ل شنگالێ و كاراكرنا سندوقا گهشهپێدانا شنگالێ كو دوو ساله ياسایا وێ دهرچۆیه و كار پێ نههاتیه كرن.
د دووماهیا ئاخفتنا خۆ دا، میر حازم بهگ سوپاسیا خهلكێ كوردستانێ كر بۆ ڤهحەواندنا ئاواران، بهتایبهت خهلكێ دهۆك و زاخۆ، ههروهسا سوپاسیا تایبهت ئارهستهی سهرۆك بارزانى كر وهكى مهرجهعێ كوردستانێ بۆ پشتهڤانیێن وى یێن بهردهوام و رۆلێ وى د رزگاركرنا شنگالێ دا، د ههمان دهم دا سوپاسییا سهرۆكێ ههرێمێ نێچیرڤان بارزانى كر بۆ بزاڤێن وى د رزگاركرنا رهڤاندییان دا، و دهستخۆشى ل مهسرور بارزانى، سهرۆك وهزیرێن ههرێما كوردستانێ كر بۆ هاریكاریێن وى یێن بهردهوام بۆ ژنێن رزگاربوو و پشتهڤانییا وی بۆ بنگههێ لالش.