پير ده‌يان:كۆچبەرێن ژ ئەورۆپا دئێنە دیپۆرتكرن دێ ئێنە قەرەبووكرن
ئه‌ڤرۆ نيوز:
پیردەیان جەعفەر، ریڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ بۆ رۆژناما ئەڤرۆ دیار كر، دەمێ سەرۆكوەزیرێ ئیراقێ محەمەد شیاع سوودانی سەرەدانا وەلاتێ ئەلمانیا كری، دبیت ل وی دەمی رێككەڤتنەك ل گەل وی وەلاتی ئێمزا كربیت، كو هەر كۆچبەرەكێ بهێتە دیپۆرتكرن، ژ لایێ حوكمەتا ئیراقێ ڤە بهێتە قەربووكرن.
پیردەیان گوت: «مە وەكو حوكمەتا هەرێما كودستانێ چ زانیاریێن تمام ل سەر ڤی بابەتی نینن، كا میكانزما قەربووكرنێ ب چ ئاوایی یە، ب تنێ حوكمەتا ئیراقێ ب رێكا هندەك رێنمایان داخواز ژ مە كریە، ناڤ و پێزانینێن وان ب رێكا فورمەكا تایبەت بهێنە تۆماركرن، هەتا نها ل دهۆكی مە چ نڤیسینگەهێن تایبەت ب ڤی بابەتی 0ڤە نینن، هەردەما ئەڤ پشكە د رێڤەبەریا مە دا هاتە چالاككرن، ئەم نەشێین چ سۆزا بدەین، بەلێ د ئامادەینە هەردەما بڕیارەك دەركەت ئەم دێ د خزمەتا خەلكێ خۆ دا بین، ژ بۆ هەر هاریكاریەكێ، چونكی پتریا خەلكێ مە مال و حالێ خۆ فرۆتینە، گرنگە ل دەمێ ڤەدگەڕنە وەلاتێ خوە بهێنە قەربووكرن».