ناڤه‌ندا نووچه‌یان – سه‌ما
جڤاتا ئێزديێن سووريێ ڕاگه‌هاند، ماوه‌يه‌كه چه‌ند كه‌س بزاڤێن دروستكرنا به‌لبه‌لێ دناڤبه‌را كوردێن ئێزدى و كوردێن موسڵمان ل ڕۆژئاڤايێ كوردستانێ دكه‌ن.
كندال ره‌مۆ، ئه‌ندامێ جڤاتا ئێزديێن سووريێ، ئيڕۆ 29-5-2025، تايبه‌ت بۆ سه‌ما گۆت: چه‌ندين كۆمه‌ل و ڕێكخراو و كه‌سايه‌تيێن ئێزدى به‌ياننامه‌يه‌ك ل دژى وان كه‌سان ل سه‌ر سۆشيال ميديايێ ده‌رێخستينه يێن بزاڤێن دروستكرنا به‌لبه‌لێ دناڤبه‌را كوردێن ئێزدى و كوردێن موسڵمان ل ڕۆژئاڤايێ كوردستانێ دكه‌ن و ئه‌ڤه جيێ قه‌بووڵكرنێ نينه.
ئه‌ندامێ جڤاتا ئێزديێن سووريێ ديار ژى كر، هنده‌ك كه‌سێن نه‌نياس ل سووريێ و ئه‌ورۆپا ڕابووينه ل تۆڕێن جڤاكى بزاڤا به‌لبه‌لێ دكه‌ن و دبێژن ئێزدى دوورى كوردانه و گه‌فێن كوشتنێ ژى كرينه، ل سه‌ر ڤان گه‌فێن وان يێن به‌رده‌وام ئه‌م دێ سكاڵايێ تۆمار كه‌ين.
ئاماژه ب وێ چه‌ندێ دا، وه‌كو ئێزدى ڕێزێ ل هه‌موو ئۆل و بيروباوه‌ران دگڕن و ل دژى بزاڤێن ڤان كه‌سان دێ سه‌كنين و كورد ل ڕۆژئاڤايێ كوردستانێ هه‌موو برايێن هه‌ڤن و چ كێشه دناڤبه‌را واندا نين.