دێ ده‌ست ب ڤه‌دیتنان بۆ نووژه‌نكرنا په‌رستگه‌ها لالش ئێته كرن
باسنيوز:
سه‌رپه‌رشتێ پرۆژه‌یێ نوژه‌نكرنا په‌رستگه‌ها لالش دیاركر:” پشتى مه‌سرور بارزانى، سه‌رۆكێ حكوومه‌تا هه‌رێما كوردستانێ سه‌ره‌دانا په‌رستگه‌ها لالش كرى و هه‌ڤدیتن دگه‌ل میر حازم ته‌حسین به‌گ و جڤاتا روحانیا ئیزدیان ئه‌نجامدایی، داخوازى ژ سه‌رۆكێ حكومه‌تا هه‌رێما كوردستانێ هاته كرن کۆ پتر پشته‌ڤانیا پرۆژه‌یێ نوژه‌نكرنا لالش بهێته كرن ل سه‌ر ڤێ داخوازیێ نوكه ده‌ست ب ڤه‌دیتن و دروست كرنا خشته‌كێ هاتیه كرن بۆ نوژه‌نكرنا په‌رستگه‌ها لالش”.
ئه‌ندازیار، خالد نه‌رمۆ، سه‌رپه‌رشتىێ پرۆژه‌یێ نوژه‌نكرنا په‌رستگه‌ها لالش بۆ (باسنیوز) راگه‌هاند:” ده‌ست ب به‌رهه‌ڤیان هاتیه كرن بۆ دروست كرنا ڤه‌دیتنان بۆ نوژه‌نكرنا په‌رستگه‌ها لالش ئه‌ڤ كارە ژلایێ ئه‌ندازیارێن پرۆژه‌یێ نوژه‌نكرنا په‌رستگه‌ها لالش و رێڤه‌به‌رییا گشتى یا كارۆبارێن ئێزدیان، وه‌زاره‌تا ئه‌وقاف و كارۆبارێن ئاینى یا حکوومەتا هه‌رێما كوردستانێ دهێته كرن و پشتى ڤه‌دیتن و خشته دهێنه به‌رهه‌ڤ كرن دێ بۆ حكوومه‌تا هه‌رێما كوردستانێ هێته هنارتن ب مه‌ره‌ما ته‌رخانكرنا پاره‌ی بۆ نوژه‌نكرنا په‌رستگه‌ها لالش كۆ حكوومه‌تا هه‌رێما كوردستانێ گه‌له‌ك گرنگی ب پرۆژه‌یێ نوژه‌نكرنا په‌رستگه‌ها لالش دایه”.
ئاشكرا كر:” هه‌تا نوكه ل دیف ماسته‌ر پلانا بۆ په‌رستگه‌ها لالش هاتیه دانان ب پشته‌ڤانیا حكوومه‌تا هه‌رێما كوردستانێ و خێرخوازێن ئێزدى و ئه‌مریكا ب رێژا 30% هه‌تا 40% په‌رستگه‌ها لالش هاتیه نوژه‌نكرن و كار ل سه‌ر پرۆژه‌یێ نوژه‌نكرنا په‌رستگه‌ها لالش به‌رده‌وامه”.