پێشەوا هەورامانی: ل بەغدا سوز هاتیە دان کۆ بەری جەژنا قوربانێ مووچەیێ مووچەخۆرێن كوردستانێ بهێتە هنارتن
باسنيوز:
پەیڤدارێ حكوومەتا هەرێما كوردستانێ زانیاریی دەربارێ مووچەیێ هێزێن ئەمنیی و مووچەیێ هەیڤا پێنج یا فەرمانبەران بەرچاڤ دکەت و دبێژیت: “سوزا هنارتنا مووچەیێ فەرمانبەر و هێزێن ئەمنیی هاتیە دان.”
پێشەوا هەورامانی، پەیڤدارێ حكوومەتا هەرێما كوردستانێ، بۆ(باسنیوز) راگەهاند: “پشتی سەردانا بەغدا ئەوا کۆ دەرەنجامێ رێككەفتنان بوویە دگەل مەسرور بارزانی سەرۆك وەزیرێن هەرێما كوردستانێ، سوز دایە کۆ بەری جەژنا قوربانێ مووچەیێ هەیڤا پێنج یا هەمی فەرمانبەران بنێرن و هەروەسا مووچەیێ هێزێن ئەمنی ژی بنێرن.”
دەربارێ پاشکەفتنا مووچەیێ هەیڤا چار یێن پێشمەرگە و هێزێن ئەمنی، پێشەوا هەرامانی گوت: “پاشکەفتنا هنارتنا مووچەیێ هەیڤا چار یێن هێزێن ئەمنی ژ لایێ بەغدا، زولمە و هیچ ڕەوایەتییەک نینە، ژبەرکۆ ئەڤ هێزە ل شەرێ داعش و ل سەرماو گەرمێ د ئەركی دان و ل پرانیا حاڵەتان پشکەک بوونە ل پاراستنا ئاسایشا عێراقێ، ژبەرکۆ نابیت پشتی 59 رۆژان وان مووچە وەرنەگربیت.”
پەیڤدارێ حكوومەتێ ئەوژی دیار کر: “هەمی لایەنێن بەغدا د کۆمبوونان دگەل سەرۆکوەزیر مەسرور بارزانی ل هەفتییا بوری، ئێکدەنگ بوون لسەر وێ ئێکێ کۆ نابیت مافێ خەلکێ هەرێما کوردستانێ بهێتە بنپێکرن و مووچەی تێکەل ب ئاریشێن سیاسی بکەن.”