ئەز ل گەل تیپا شاریا مەزن بوویمە
ئه‌ڤرۆ نيوز:
كاژین ئیسماعیل میرزۆ، ئەنداما تیپا شاریا یا هونەرێ مللی، د دیدارەكێ دا بۆ رۆژناما ئەڤرۆ گۆت: ئەڤە بیست و پێنچ سالن كارێ سەمایێ دكەم، راستە بۆ دەمەكی دووركەفت بووم، بەلێ جارەكا دی زڤریمەڤە و ژبەركو گەلەك حەزژێ دكەم و ل گەل ئەڤێ تیپێ یا مەزن بوویم وەكو یا دیار دەڤەرا شنگالێ گەلەك یا دەولەمەندە ب فۆلكلۆرێ خۆ و گەلەك دیلان هەنە دكەڤن دا دهاتنە كرن و نوكە هاتینە ژبیركرن و تیپا مە ئەو دیلانە زڤراندینە و ئەم د تابلۆێن خۆدا نیشا ددەین.
هەروەسا گۆت: مەگەلەك جۆرێن سەمایێ هەنە و هندی سەمایەكا گرێدای ب ئێزدیان ڤە بیت ئەم دكەین وەكو دیلانا ملا و سێڤا سور و خزێم و شێخانیا شڤانا و شێخانی و تالان، هەروەسا مە گەلەك تابلۆژی ژ دیلان و نەریتێن خوە دروستكرینە، وەكو شڤان و بێری و جۆتیار و گەلەكێن دی رۆژانە ژی راهێنانان ل سەر تابلۆێن خوە دكەین و هەكە مە چالاكیەك یان ئاهەنگەك، یان فەستیڤالەك هەبیت بەری دەمی ئەم راهێنانان ل سەر تابلۆیامە دەستنیشانكری دكەین.