ستافێ سەما خۆلێن میدیایی ل کوردستان 24 دبەن
سه‌ما
ستافێ كه‌نالێ سه‌ما تى ڤى يێ تايبه‌ت ب كوردێن ئێزدى،سه‌ره‌دانا ئۆفيسا سه‌ره‌كى يا كه‌نالێ كوردستان 24 ل هه‌ولێرێ كرن و ژئاليێ كارمه‌ندێن كه‌نالى ڤه هاتنه پێشوازيكرن،بۆ هندێ ژ نێزيك ڤه هايدارى ب ڕێڤه‌چوونا كارى وى ده‌زگه‌هى ببن.
ل ڕۆژا شه‌مبوويێ 27ى تيرمه‌ها 2024ێ، ستافێ كه‌نالێ سه‌ما تى ڤى سه‌ره‌دانه‌ك برنه ئاڤاهيا كه‌نالێ كوردستان 24 ل هه‌ولێرێ،پشتى پێشوازيكرنێ ژئاليێ كارمه‌ند و ستافێ كه‌نالى ڤه،گه‌ريانه‌ك دناڤ هه‌موو پشكان دا كر.
ستافێ سه‌ما بۆ ماوێ دوو ڕۆژان ل كه‌نالى دمينن،دچارۆڤێ خۆلێن ميديايى دا ژ نێزيك ڤه پرۆسه‌يا چاوانيا ب ڕێڤه‌چوونا كارى ل هه‌موو پشكان ب شێوى تيرورى و پراكتيكى ببينن.
سه‌رێ چه‌ند مه‌هانه ستافێ كه‌نالێ سه‌ما به‌شدارى خۆلێن ڕاگه‌هاندنێ يێن سه‌ر كارێ ته‌له‌ڤزيۆنى دبن،هه‌م ژ ئاليێ ناڤه‌رۆك و دارشتن و نڤيسينێ و ته‌كنيكى ڤه،ژبۆى ل داهاتى كارێن باش ئه‌نجام بده‌ن.
سه‌ما دنۆكه دا مژوولى خۆ به‌رهه‌ڤكرنێ يه بۆ ده‌ستپێكرنا په‌خشى،كو چاڤه‌رێ يه پشتى ته‌مامبوونا هه‌موو كارێن ته‌كنيكى ل ده‌مه‌كێ نێزيك بكه‌فته دخزمه‌تا چاند و كه‌لتۆرێ ئێزديان دا.
كه‌نالێ سه‌ما ئێك ژ ده‌ستكه‌فتێن بنگه‌هێ لالش يێ ڕه‌وشه‌نبيرى و كۆمه‌ڵايه‌تى يه ب پشته‌ڤانى راسته‌وخۆيا ڕێزدار مه‌سرور بارزانى سه‌رۆكێ حكومه‌تا هه‌رێما كوردستانێ،وێ ل نێزيك دا كه‌فته دخزمه‌تا جڤاكا ئێزديان و ميديا كوردستانى دا.
حكومه‌تا هه‌رێما كوردستانێ گرنگيه‌كا مه‌زن ب كوردێن ئێزدى دده‌ت و ژ هه‌موو ئاليان ڤه خزمه‌ت و پشته‌ڤانى و هاريكاريا وان دكه‌ت.
