كچه‌كا ڕزگاربووى:پرۆژێ حكومه‌تا هه‌رێمێ هانداين به‌رده‌واميێ ب خواندنا خۆ بده‌ين
سه‌ما
ب بريارا مه‌سرور بارزانى،سه‌رۆكوه‌زيرێن حكومه‌تا هه‌رێما كوردستانێ،قوتابيێن ڕزگاربوويێن ده‌ستێ داعش دێ ڤه‌گه‌رنه خواندنێ و ڤێ بريارێ ڕزگاربووى و جڤاكا ئێزدى دلخۆشكرينه.
ئه‌ميرا عه‌لى،كچه‌كا ڕزگاربوويا ئێزدى،ئيرۆ 25ى تيرمه‌ها 2024ێ،بۆ سه‌ما ڕاگه‌هاند؛ ئاسانكاريێن وه‌زاره‌تا په‌روه‌رده‌يا حكومه‌تا هه‌رێما كوردستانێ بۆ قوتابيێن ڕزگاربوويێن ئێزدى ب مه‌به‌ستا دووباره ڤه‌گه‌راندنا وان بۆ خواندنێ پێنگاڤه‌كا گرنگ بوو هاتيه دان،ژبه‌ركو هه‌ژماره‌يه‌كا زۆر يا ڕزگاربوويان دێ مفادار بن.
ئه‌ميرايێ ئاماژه ب وێ چه‌ندێ دا پشتى بريارا سه‌رۆكوه‌زيران بۆ ڤه‌گه‌ريانا قوتابيێن ڕزگاربووى هاتيه دان،ڤێ يه‌كێ هانداين دووباره خواندنا خۆ ته‌مام بكه‌ين و سوپاسيا سه‌رۆكێ حكومه‌تێ دكه‌ين بۆ پشته‌ڤانى يا وى يا به‌رده‌وام بۆ ڕزگاربوويێن ئێزدى.
ل ڕۆژا پێنج شه‌مبوويێ 18ى تيرمه‌ها 2024ێ،ئالان حه‌مه سه‌عيد،وه‌زيرێ په‌روه‌رده‌يا حكومه‌تا هه‌رێما كوردستانێ دپرێسكۆنفرانسه‌كێ ڕۆژنامه‌ڤانى دا و ب ئاماده‌بوونا سێ ڕزگاربوويێن ژ ده‌ستێ داعشێ، باس ل بريارا مه‌سرور بارزانى سه‌رۆكێ حكومه‌تێ كر كو تايبه‌ته ب ڤه‌گه‌ريانا قوتابيێن ڕزگاربوويێن ئێزدى بۆ سه‌ر پرۆسه‌يا خواندنێ كر.
وه‌زيرێ په‌روه‌ردێ ڕاگه‌هاند؛ل بن رۆناهييا رێزدار مه‌سرور بارزانى ڕزگاربوويێن ل ژێر ده‌ستێ داعش يێن ناڤێن وان ل ليستا ڕزگاربوويان هاتينه تۆماركرن و ژ خواندنێ هاتبنه ڤه‌قه‌تاندن هه‌موو ئاسانكارى دێ ئێنه كرن دووباره ڤه‌گه‌رنه خواندنێ.
د چارچۆڤێ بڕیارا سەرۆکوەزیران، ئەڤ فەرمانا وەزاری هاته دەرکرن:
1- رێڤه‌به‌ريێن گشتى ل پارێزگه‌هـ و ئيدارێن سه‌ربه‌خۆ ئه‌و ب خۆ دێ سه‌رپه‌رشتييا لژنه‌يه‌كا تايبه‌تمه‌ند د وى بياڤى دا كه‌ن، ب تايبه‌تى ل پارێزگه‌ها دهۆكێ و ئيدارا سه‌ربه‌خۆيا زاخۆ چنكو زۆرينه‌يا رزگاربوويان ل وى سنورى د ئاكنجى نه.
2- ده‌سهه‌لاتا ره‌ها بۆ ده‌رئێخستنا مه‌رجێ ته‌مه‌نى به‌خشينه رێڤه‌به‌ريێن گشتى ل پارێزگه‌هـ و ئيدارێن سه‌ربه‌خۆ ل په‌ى وێ نڤيسارا سه‌رۆكێ حكومه‌تێ ئاماژه پێ دايى.
3- هه‌موو رزگاربوويێن پۆلا 9 بنه‌ره‌تى ته‌مامكرى، و كه‌فتينه د ده‌ستێ داعش ده و ژ خواندنێ ڤه‌قه‌تياين و پشتى ئازادكرنێ ته‌مه‌نێ ياسايى ب سه‌رڤه‌چۆبت، بريار هاتيه دان ئه‌ڤ برگه بێته ڕاگرتن و ڤه‌گه‌رنه به‌ر كه‌رتێ خواندنێ.
4- هه‌موو ڕزگاربوويێن ناڤێن وان د ليستا رزگاربوويان ده و ده‌رچۆيێن نه‌هێ بنه‌ره‌تن، مافێ هه‌ين بێ به‌رامبه‌ر ل په‌يمانگه‌هێن ئه‌هلى بخوونن.
ب گۆڕه‌ى گۆتنا وەزیرێ پەروەردێ ئەڤ فەرمانە هەر ژ رۆژا 18/7/2024ێ دێ کەفتە د بیاڤێ ب جهئینانێ دە و بۆ سالا خواندنێ 2024/2025 دێ ئێته په‌يره‌وكرن.