سه‌ما
ده‌سته‌یا ده‌ستپاكیێ یا عیراقێ راگه‌هاند، ل مه‌ها بۆرى 36 فه‌رمانێن ده‌سته‌سه‌ركرن و ئینانا به‌ر دادگه‌هێ بۆ 31 به‌رپرسێن پله بلند و تایبه‌ت ده‌ركرینه، “بهایێ زێده‌تر ژ 112 ملیار دینار ژ دراڤێ ده‌وله‌تێ مه ڤه‌گه‌راندیه یان مه نه‌هێلایه ب فیرۆ بچیت”.
ده‌سته‌یا ده‌ستپاكیێ یا عیراقێ د راگه‌هاندنه‌كێ دا ئاشكرا كر، “مه‌ها تیرمه‌هێ یا بۆرى 36 فه‌رمانێن ده‌سته‌سه‌ركرن و ئینانا به‌ر دادگه‌هێ بۆ 31 به‌رپرسێن پله بلند و تایبه‌ت ده‌ركرینه، ب پشتبه‌ستن ب لێكۆلینێن ب رێڤه‌به‌ریان و نڤیسینگه‌هێن لێكۆلینێ ل به‌غدا و پارێزگه‌هان هاتینه ره‌وانه‌كرن بۆ دادگه‌هێ”.
ل دووڤ راگه‌هاندنا ده‌سته‌یێ، 30 تۆمه‌تبار فه‌رمانا ئینانا به‌ر دادگه‌هێ و شه‌ش ژى فه‌رمانا ده‌سته‌سه‌ركرنێ بۆ وان هه‌بوویه، دوو ژ وان وه‌زیرێن به‌رێ، ئێك وه‌زیرێ به‌رێ يێ تر، ئه‌ندامه‌كێ په‌رله‌مانێ و شه‌ش ب رێڤه‌به‌رێن گشتى یێن نۆكه، 14 ب رێڤه‌به‌رێن گشتى یێن به‌رێ و دوو ب رێڤه‌به‌رێن گشتى یێن به‌رێ تر، ژبلى ژ پارێزگاره‌كێ به‌رێ و سێ پارێزگارێن به‌رێ يێن تر.
ده‌سته‌یا ده‌ستپاكیێ دبێژت: د وێ مه‌هێ دا بهایێ زێده‌تر ژ 99 ملیار دینار كو هاتبوونه دزین هاتنه ئاشكراكرن، نێزیكى سێ ملیار دیناران ب گۆر بریارا یاسایى هاتنه ڤه‌گه‌راندن، نێزیكى 10 ملیار دیناران ژى ب كرده‌یى هاتنه ڤه‌گه‌راندن.