ئەڤرۆ، ل 36مین سالڤەگەرا ئەنفالا بادینان، ئەم ب کول و ژان ڤێ تراژیدیێ ب بیر تینین. ئەڤ رویدانا دلتەزین بەشەک ژ زنجیرا تاوانێن رژێما بەعس بوو دژی گەلێ کورد، کو ب درێژاهیا دەستهەلاتا خوە گەلەک جاران هەول دا کو ناسناما کوردی ژ ناڤ ببەت.
ئەنفال، زێدەتر ژ هەشت قۆناغان پێکهات. د ڤان قۆناغان دا، ب هەزاران گوندێن کوردی هاتنە وێرانکرن، ب سەدان هەزار کەس هاتنە کوشتن یان ب زۆری ژ جهێ خوە هاتنە راگوهاستن، و ژیانا گەلەک خەلکێ دی هاتە تێکدان. بادینان، یەک ژ وان دەڤەران بوو یێن کو گەلەک زەرەر ژ ڤێ تاوانێ دیتین.
لێ تاوانێن رژێما بەعس نە تەنێ ب ئەنفالێ سنووردار بوون. ژ کیمیابارانا هەلەبجە هەتا وێرانکرنا ب هەزاران گوندان، ژ گۆڕێن بکۆم هەتا زیندانکرن و ئەشکەنجەکرنا ب دەههەزاران کەسان، رژێمێ هەول دا کو گەلێ کورد ژ ناڤ ببەت. ژ بلی ڤێ یەکێ، سیاسەتێن تەعریب و گوهۆرینا دیمۆگرافیا ناڤچەیان، نەهێلانا زمانێ کوردی و قەدەغەکرنا چاندا کوردی، هەمی بەشەک بوون ژ پلانا بەعسیان بۆ ژناڤبرنا ناسناما کوردی.
جڤاکا ئێزدی، وەک بەشەک ژ پێکهاتەیێن کوردستانێ، د ڤێ قوناغێ دا گەلەک ئازار کێشان. ئەو ژی بوونە قوربانیێن سیاسەتێن پاکتاوکرنێ یێن رژێمێ و گەلەک جاران راستی زولم و زۆرداریێ هاتن.
د ڤێ رۆژا یادکرنێ دا، ئەم رێزێ ل هەمی قوربانیان دگرین و سۆزا خوە دوبارە دکین کو ئەم دێ هەر بەردەوام بین ل سەر ڤەگۆتن و پاراستنا چیرۆکا وان.
بلا ئەڤ یادکرن ببیتە هۆکارەک بۆ یەکرێزی و هێزێ، دا کو ئەم ب هەڤرا داهاتیەکا گەشتر ئاڤا بکین. دڤێت ئەم هەمی پێکڤە کار بکین بۆ ئاڤاکرنا کوردستانەکا ئازاد و دیموکرات، کو تێدا مافێن هەمی پێکهاتەیان بێنە پاراستن و هەمی کەس ب ئازادی و رێزگرتن بژین.”
بنگەهی لالش یێ ڕەوشەنبیری و کۆمەڵایەتی/
دهۆک
٢٥-٨-٢٠٢٤