سه‌ما
ل باژاره‌كێ ئەلمانیا کەسەک ب کێره‌كا ڤەشارتی دچته دناڤ بەشداربوویێن ئاهەنگێ دا و سێ کەس کوشتینە و چار کەسێن دی ژی ب گرانی بریندار کرینە.
ئەلیکساندەر کریستا په‌يڤدارێ پۆلیسێن دوسلدۆرف بۆ ئاژانسا فرانس پرێس راگەهاندیە، هێرش شەڤا 23 ل سەر 24ێ تەباخێ، د دەمێ ئاهەنگا 650 سالیا دامەزراندنا باژێرێ سۆلینگن دا بوویە، کو دکەفتە باکوورێ راین ڤێستفالیا، لێ هەموو جهـ ب پۆلیسان هاتینە دۆرپێچکرن و هەوه‌كا بەرفرەهـ بۆ دەسته‌سه‌ركرنا کێرڤەشارتی دەست پێ کریە و ژ ئاسمانی ڤە ژی ب هەلیکۆپتەرێ چاڤدێریا دەڤەرێ تێ کرن.
کریستا دبێژت: کێرڤەشارتیێ دەستێ خۆ ژ کەسەکی نەپاراستیە و ل هەر چار ئالیێن خۆ دا کێر ڤەشارتیە، لەوما داخواز ژ خەلکێ هاتیە کرن کو زوو جهێ ئاهەنگێ چۆل بکەن و بەلاڤ ببن.
هەروەسا ئاماژە دایە، زانیاریێن تەمام ل سەر گومانلێکریێ د دەستێ وان دا نینن، لێ د وێنەیێن تۆمارکری دا رویێ وی دیار بوویە و پۆلیس سەرقالێ کۆمکرنا زانیاریانە ل سەر ئاشکراکرنا ناسناما وی.
هەر د بارێ رویدانێ دا، تیم ئۆلیڤەر کورزباخ، سەرۆکێ شارەوانیێ ل مالپەرا ئەلەکترۆنی یا شارەوانیا سۆلینگن نڤیسیە: “ئەڤ شەڤ هەموو ئەم توشی ترس و خەمەکا مەزن بووین، مە دڤیا پێکڤە یادا دامەزراندنا باژێرۆکا خۆ بکەین، لێ نها کوشتی و برینداری هەنە و هەموو ئەم خەمگین ین بۆ وان یێن بووینە قوربانی”.
ئاکنجیێن باژێرێ سۆلینگن پتر ژ 150 هه‌زار کەسانه و دکەفتە نێزیکی دوسلدۆرف ل باکوورێ کۆلن.