سه‌ما
ل رۆژا چارشه‌مبوويێ 21ى ته‌باخا 2024ێ،ب سەرپەرشتيیا سەرۆکوەزیران مەسرور بارزانی و ئامادەبوونا قوباد تاڵەبانی، جێگرێ سەرۆکوەزیران، جڤاتا وەزیرێن هەرێما كوردستانێ كۆمبوون و چەندین تەوەرێن گرنگ هاتنە گوتۆبێژكرن.
د بڕگا ئێكێ یا كۆمبوونێدا، ڕاپۆرتا لژنا هەڤپشک یا هەردوو دیوانێن چاڤدێریا دارایی یا فیدرال و هەرێمێ هاتە پێشکێشکرن، ئەڤ راپۆرتە ل سەر داهات، خەرجی، میلاک و تۆمارێن بایۆمەتری بۆ سێ هەیڤێن ئێکێ یێن ئەڤسالە 2024ـێ بوو، جڤاتا وەزیران دووپات كر کو دڤێت وەزارەتا دارایی یا فیدرال مووچەیێن فەرمانبەرێن هەرێمێ د دەمێ خۆ دا بهنێریت، وەك یێن پارێزگەهێن دی یێن عیراقێ، هەروەسا جڤاتا وەزیرێن هەرێما كوردستانێ دیاركر، كو زێدەتری 30 ڕۆژایە لیستا مووچەیێ فەرمانبەرێن هەرێما كوردستانێ یێ هەیڤا حەفت بۆ بەغدا هاتییە ڕەوانەكرن، بەلێ هەتا نوكە مووچەیێ فەرمانبەران نەهاتییە خەرجكرن و نابیت تێبینی و سەرنجێن دیوانا چاڤدێریا دارایی یا عیراقێ ببنە ئەگەرێ ڕاگرتنا مووچەیێن فەرمانبەرێن هەرێمێ.
د بڕگا دووێ یا كۆمبوونێدا، ڕاپۆرتەك ل سەر کارێن لژنا هەڤپشک یا حکومەتا هەرێمێ و یا فیدرال بۆ ئێكخستنا ڕێکارێن دارایی هاتە پێشکێشکرن، هەروەسا جڤاتا وەزیران داخاز کر کو ڕەشنڤیسا بریارەکێ ل سەر ڤێ بابەتی بهێتە ئامادەکرن بۆ کۆمبوونا بهێت دا.
د بڕگا سیێ یا كۆمبوونێدا، هەماهەنگییا دناڤبەرا کۆمسیۆنا بلند یا هەلبژارتنان یا عیراقێ و سەرۆکاتییا هەرێمێ و حکومەتا هەرێما کوردستانێ هاتە گەنگەشەکرن، ئارمانج ئەوە کو هەلبژارتنێن پەرلەمانێ کوردستانێ یێن 20ـێ ئۆکتۆبەرێ ب سەرکەفتی بهێنە ئەنجامدان، جڤاتا وەزیران پشتەڤانییا خۆ بۆ هەلبژارتنەکا پاقژ و ب ئارامی دووپات کر.
د بڕگا چارێ یا كۆمبوونێدا، وەزیرێ بازرگانی و پیشەسازیێ راپۆرتەك پێشکێش کر ل دۆر کڕینا گەنمێ جووتیارێن هەرێمێ و مافێن وان یێن دارایی، جڤاتا وەزیران داخاز ژ وەزارەتێن پەیوەندیدار و دەستەیا وەبەرهێنانێ کر کو پێکڤە کار بکەن بۆ بازارکرنا گەنمێ جووتیارێن هەرێمێ یێ کو ژ لایێ حکومەتا فیدرال ڤە نەهاتیە وەرگرتن، هەروەسا داخاز کر کو پلانەکێ بۆ بەرهەمێ سالا بهێت بۆ جووتیاران دانن و د پەیوەندیێ دا بن ل گەل حکومەتا فیدرال بۆ پاراستنا مافێ جووتیارێن هەرێمێ.