سه‌ما
پێشڤەبەرێن سەپانا واتسئاپێ یا ناڤدارترین و بەربەلاڤترین ل سەرانسەری جیهانێ بۆ پەیامناردنێ، دەست ب تاقیکرنا تایبەتمەندیەکا نوی کرینە کو هاریکاریێ دکەت د کارلێکرنێ دگەل رەوش و چیرۆکێن کو دهێنە پارڤەکرن ل سەر سەپانێ، هەروەکی د بەرسڤدانێ دا بۆ کارلێکرنێ دگەل پۆستێن بەردەست دا یێن هەین.
واتسئاپ بەردەوامە د پێشڤەبرنا تایبەتمەندیێن نوی دا بۆ باشترکرنا ئەزموونا بکارهێنەران، و چاڤەرێ دهێتە کرن کو تایبەتمەندیا کارلێکرنا زوو دگەل نویکرنێن رەوشێ دێ ب زوویی هێتە بەردان، کو پلاتفۆرما خودان میتا دەست ب تاقیکرنا ڤێ تایبەتمەندیێ کریە ل سەر سیستەمێ ئەندرۆید ب ڤەرژنا تاقیکرنێ ژمارە 2.24.17.21 ژ سەپانێ.
ئەڤ تایبەتمەندیە دێ رێ دەت بکارهێنەران کو کارلێک بکەن دگەل نویکرنێن رەوشێ ب رێیا بشکۆکەکا “پەسەندکرن” ب شێوێ دلی، کو دێ دەرکەڤیت ل تەنیشت چارچۆڤێ دەقێ “بەرسڤ”. دەمێ کارلێکرن دگەل رەوش یان چیرۆکەکا دیارکری ب پەسەندکرنێ، خودانێ رەوشێ دێ شێت وێ ببینیت د ناڤ لیستا تەماشەڤانان دا، هەروەکی چەوا کارلێکرنێن چیرۆکان ل سەر ئینستاگرامێ کار دکەن.
سەرەرای هندێ، بکارهێنەر دێ هەبیت بژاردە کو دیار بکەن کا ئەرێ دخوازن ئاگەهداریان وەرگرن ژ ڤان کارلێکرنێن پەسەندکرنێ یان نە.
ژ لایەکێ دی ڤە، و د چارچۆڤێ هەولێن واتسئاپێ دا بۆ بهێزکرنا ئەمنیەت و تایبەتمەندیێ، سەپان هەروەسا کار دکەت ل سەر پێشڤەبرنا تایبەتمەندیەکا نوی کو دێ رێ دەت بکارهێنەران کو پەیامان قەدەغە بکەن ژ هەژمارێن (ژمارێن) نەناسکری و نە تۆمارکری د ناڤ پەیوەندیان دا.
ئەڤ تایبەتمەندیە هاتیە دیتن د هەمان ڤەرژنا تاقیکرنێ یا سەپانێ بۆ سیستەمێ ئەندرۆید، و دێ رێ دەت سەپانێ کو پەیامان ب شێوەیەکێ ئۆتۆماتیکی قەدەغە بکەت ژ وان ژمارێن کو پەیامان ب رێژەیەکا زۆر دشینن بێ ناسینا شاندەری.
هەژی گۆتنێ یە کو ئەڤ تایبەتمەندیە هێشتا د قۆناغا پێشڤەبرنێ دا یە و هێشتا نەهاتیە بەردان تەنانەت بۆ بکارهێنەرێن تاقیکرنێ، و هێشتا نەیێ دیار کا کەنگی دێ ب فەرمی هێتە بەردان.
ئەڤ باشکرن د دەمەکی دا دهێن کو سەپان بەردەوامە د باشترکرنا ئەزموونا بکارهێنانێ دا. د دەمەکێ نێزیک دا، تایبەتمەندیا تیمێن چەتکرنێ هاتە دیتن، کو ئەو ژی شیانا گۆهۆرینا شکلێ چەتکرنان ب تەمامی یە و نە بتنێ گۆهۆرینا پاشبنەمایێ وەک نوکە هەی، لێ ئەو ژی هێشتا د قۆناغێن تاقیکرنێ دا یە، و چاڤەرێ دهێتە کرن کو دێ ب زوویی گەهیتە بکارهێنەرێن مۆبایلێن ب سیستەمێ ئەندرۆید و ئامیرێن ئایفۆن ب سیستەمێ iOS، ل دویڤ وان زانیاریێن هاتین.