سه‌ما
ڕێڤه‌به‌رێ كاروبارێن ئێزديان ل دهۆكێ ڕادگه‌هينت، ئێك ژ ئه‌ركێن كابينه‌يا نه‌هێ يا حكومه‌تا هه‌رێما كوردستانێ خزمه‌تكرنا په‌رستگه‌ها لالش و مه‌زارگه‌هێن پيرۆزێن ئێزديان بوويه و به‌رده‌وام پشته‌ڤانى يا ئێزديان دكه‌ت.
جه‌عفه‌ر سمۆ، ڕێڤه‌به‌رێ كاروبارێن ئێزديان ل دهۆكێ بۆ سه‌ما ڕاگه‌هاند؛ هه‌ر ل ده‌ستپێكا ده‌ست ب كاربوونا جه‌نابێ رێزدار مه‌سرور بارزانى وه‌كو سه‌رۆكێ حكومه‌تا هه‌رێما كوردستانێ، ئێك ژ خالێن كارنه‌مه‌يا وى ئه‌و بوو خزمه‌تا هه‌موو پێكهاته‌يان بكه‌ت و مه ئێزديان ژى مفايه‌كێ باش ژڤێ كابينێ ديتى يه، جه‌نابێ وى هه‌رده‌م خۆ ل كێشێن ئێزديان كريه خودان و ب تايبه‌ت ژى ژ ئاليێ ئۆلى ڤه، باشترين به‌لگه ژى ئه‌وه كو دسه‌ره‌دانه‌كا تايبه‌ت دا ل رێكه‌فتى 3/6/2024ێ سه‌ره‌دانا په‌رستگه‌ها لالش كر و ژئاليێ مير وجڤاتا رۆحانى وچه‌ند كه‌سايه‌تيێن ئێزديان ڤه هاته پێشوازيكرن.
گۆت ژى :خزمه‌تكرنا په‌رستگه‌ها لالش و مه‌زارگه‌هێن پيرۆزێن ئێزديان، ئێك ژ ئه‌ركێن حكومه‌تا هه‌رێما كوردستانێ يه، ل ڤان چار سالێن داويێ ژ گرنگترین پرۆژه‌يێن ل په‌رستگه‌هێ هاتينه ئه‌نجامدان ب پشته‌ڤانى يا سه‌رۆكێ حكومه‌تێ ، ئه‌و ژى چێكرنا جووتساید و ده‌روازێ گرنگ و ب شێوازه‌كى ديرۆكى يێ په‌رستگه‌هێ، دروستكرنا كارگه‌ها زه‌یتا زه‌یتوونان، دابينكرنا عه‌مبارا ئاڤێ و چه‌ندين پرۆژه‌يێن دى.
ديار ژى كر، ڕێڤه‌به‌ريا كاروبارێن ئێزديان ل دهۆكێ چه‌ندين پرۆژه هنارتينه و هژماره‌كا باش ژ وان پرۆژه‌يان مه راده‌ستى ڕێڤه‌به‌ريا گشتى يا كاروبارێٍن ئێزديان كرينه و ب ڕێكا جه‌نابێ وه‌زيرێ ئه‌وقافێ و ل سه‌ر ڕاسپارده‌يێن جه‌نابێ سه‌رۆكێ حكومه‌تێ ، به‌رده‌وام خزمه‌تا ڤان مه‌زارگه‌هان هاتيه كرن و هه‌رچه‌نده مه‌زارگه‌هێن ئێزديان گه‌له‌كن و پتر پێدڤى ب پشته‌ڤانيێ نه، ئه‌وا حكومه‌تا هه‌رێما كوردستانێ دشيان دا بت درێغى نه‌كريه.
جه‌عفه‌ر سمۆ ئاشكرا‌كر: ژ ئاليێ پێكڤه‌ژيانێ ژى به‌رده‌وام وئێك ژ كارێ سه‌ره‌كى يێ مه ئه‌وه وه‌كو ڕێڤه‌به‌ريا كاروبارێن ئێزديان، ئه‌م دووپاتيێ ل خورتكرنا پێكڤه‌ژيانێ بكه‌ن وبرايه‌تى وهه‌ڤدووقه‌بوولكرنێ دناڤ ئێكو دوودا به‌رقرار بكه‌ين.
دوپاتكر ژى: حكومه‌تا كوردستانێ هه‌ر چى پێنگاڤه‌كا ئه‌م پاڤێژن بۆ خێرێ و پتر مكومكرنا پێكڤه‌ژيانێ مه هاندده‌ت و پشته‌ڤانيێ ل مه دكه‌تن.
هه‌روه‌سا ئاماژه ب وێ چه‌ندێ دا سه‌رۆكێ حكومه‌تێ به‌رده‌وام پشته‌ڤانى يا سازيێن ئێزديان دكه‌ت و ڤێ داويێ چه‌ند پرۆژه‌يێن گرنگ بۆ ڕزگاربوويێن ژ ده‌ستێ داعشێ ڕاگه‌هاندن و ئه‌ڤه جهێ ده‌ستخۆشيێ نه.
ناڤهاتى دا زانين، چه‌ندين پرۆژێن دى ژى هاتينه ڕه‌وانه‌كرن و مه هيڤى هه‌يه وئه‌م ل وێ باوه‌ريێ نه جه‌نابێ سه‌رۆكێ حكومه‌تێ كا چاوا خزمه‌تا هه‌موو ئاليێن ژيانا ئێزديان وسازيێن ڕه‌وشه‌نبيرى يێن ئێزديان وكاروبارێن ئۆلى دكه‌ت ،به‌رده‌وام دێ خزمه‌تێ كه‌ت چنكو ئه‌وا دشيان دا بت درێغى نه‌كريه.