سه‌ما
چالاكڤانه‌كێ ئێزدى دبێژت،حكومه‌تێن ناڤخۆيى يێن مووسل ژ روويێ ئيدارى ڤه غه‌دره ل ئێزديێن سنوورێ ناحيا ئه‌لقوش كريه و مافێن وان ل ئاستێ پێدڤى دا نينن.
كاوه عيدۆ خه‌تارى، چالاكڤانێ ئێزدى دبوارێ جڤاكێ سڤيل دا بۆ سه‌ما راگه‌هاند، ل سنوورێ ئه‌لقوش پتر ژ 33 گوند و كۆمه‌لگه‌هان هه‌نه و پتريا وان يێن ئێزديانه، ژ روويێ كارگێرى ڤه حكومه‌تێن ناڤخۆيى يێن مووسل ،قه‌زايا تلكێف و ئه‌لقوش غه‌دره ل ئێزديان كريه، ژ سه‌رجه‌مێ پتر ژ پازده فه‌رمانگه‌هێن حكومى بتنێ 2 تا 3 پۆستێن رێڤه‌به‌رى هاتينه دان و ب گشتى بێ به‌هرن ژ ڤان پۆستان.
خه‌تارى ئاشكراكر: ئێزدى 85% ئاكنجيێن ناحيا ئه‌لقووش پێك دئينن و خودان كه‌سايه‌تى و پله و باوه‌رنامێن بلندن هه‌ژى نه پۆستێن ئيدارى وه‌رگرن، وه‌كو پێدڤى مافێ وان نه‌هاتيه دان.
ناحيا ئه‌لقوش دكه‌فته باكوورێ باژێرێ مووسل ب دوراتيا نێزيكى 50 كيلۆمه‌تران و سه‌ر ب قه‌زا تلكێفێ يه، پتريا ئاكنجيێن وێ ئێزدينه و مه‌سيحى ژى ل سه‌نته‌رێ وێ دژين ، ب چيا و سروشتێ خۆ يێ جوان يا بناڤ و ده‌نگه ل ده‌ڤه‌رێ.