سه‌ما
ل ده‌ما تيرۆرستێن داعش ده‌ست بسه‌ر ناحيا باشيكێ دا گرتى هه‌موو مه‌زارگه‌هێن ئۆلى يێن ئێزديان په‌قاندن و ژناڤبرن، كو نێزيكى 50 مه‌زارگه‌هـ و نيشانگه‌هان بوون.
ل 3ى ته‌باخا 2024ێ تيرۆرستێن داعشێ هێرشى باشيكێ كر، كو 20 كيلۆمه‌تران ژ مووسلێ دووره و ب ته‌مامى داگيركر.
ئه‌ندازيار خێرى گدى، سه‌رپه‌رشتيارێ ئاڤاكرنا مه‌زارگه‌هان ل باشيكێ، ئيرۆ 10 ته‌باخا 2024ێ بۆ سه‌ما راگه‌هاند، ده‌ما داعش ده‌ست بسه‌ر وێ ده‌ڤه‌رێ دا گرتى، ئێك ژ كريارێن وان يێن هۆڤانه ژ ناڤبرنا مه‌زارگه‌هـ و نيشانگه‌هێن ئێزديان ب تايبه‌تى بوويه.
گدى ئاشكراكر: ده‌مێ باشيك ل سه‌ر ده‌ستێ هێزێن پێشمه‌رگه‌يێن كوردستانێ ژ ده‌ستێ داعشێ هاتيه رزگاركرن و ئارامى به‌رقراربوويى، خه‌لكێ ده‌ڤه‌رێ يێ ده‌ربه‌ده‌ربوويى دووباره ڤه‌گه‌ريانه سه‌ر مال و حالێ خۆڤه.
رۆنكر ژى: ب پشته‌ڤانى يا حكومه‌تا هه‌رێما كوردستانێ و خێرخوازێن ئێزدى و چه‌ند لايه‌نێن دى،دووباره ده‌ست ب ئاڤاكرنا 24مه‌زارگه‌هـ و 24 نيشانگه‌هان هاته كرن هه‌موو هاتينه نووژه‌نكرن،وه‌ك به‌رێ خه‌لك سه‌ره‌دانا وان دكه‌ن و رێوره‌سمێن هه‌لكه‌فتێن خۆ يێن ئۆلى و جڤاكى دگێرن.
ب سه‌رپه‌رشتيا هێزێن پێشمه‌رگه‌ى ل 23ى ئوكتۆبه‌را 2016ێ، ئۆپه‌راسيۆنا رزگاركرنا ناحيا باشيكێ ژ ده‌ستێن داعشێ ده‌ستپێكر، پشتى 15 رۆژان ژ دوورپێچكرنێ هێزێن پێشمه‌رگه‌ى چوونه ناڤا باژێرى و كۆنترۆلكرن.
پشتى رزگاركرنا باشيكێ ل سه‌ر ده‌ستێ پێشمه‌رگه‌ى، ئاواره‌يێن ئێزدى ب تايبه‌تى ڤه‌گه‌ريانه سه‌ر زێدى خۆ،ئه‌وان ده‌ست نه داهێلان و دووباره ده‌ست ب ئاڤادانكرنا مالێن خۆ يێن وێرانكرى كرن، ژ وانژى ئاڤاكرنا مه‌زارگه‌هێن ئۆلى بوون.
ناحيا باشيكێ ژ چه‌ندين ئۆل و نه‌ته‌وه‌يان پێك دئێت، دكه‌فته باكوورێ رۆژهه‌لاتێ باژێژێ مووسل.