سه‌ما
سه‌رۆكێ سازييا ئێزديان يا نێڤ ده‌وله‌تى بۆ به‌ره‌نگاريا جينۆسايدێ ئاماژێ ب وێ چه‌ندێ دده‌ت،ل سه‌ر ئاسته‌كێ بلند كار ل سه‌رناساندنا جينۆسايدا ئێزديان هاتيه كرن.
تا نۆكه زێده‌ترى ( 18)وه‌لات و سازييان ل سه‌ر ئاستێ نێڤ ده‌وله‌تى ژوانژى هه‌رێما كوردستانێ، كه‌يسا ئێزديان وه‌كو جينۆسايد ناسانديه.
حه‌سۆ هورمی، سه‌رۆكێ سازييا ئێزديان يا نێڤ ده‌وله‌تى بۆ به‌ره‌نگاريا جينۆسايدێ، ئيرۆ 8ى ته‌باخا 2024ێ، د لێداوانه‌كا تايبه‌ت دا بۆ سه‌ما دياركر، پێنگاڤێن باش بۆ كه‌يسا جينۆسايدێ هاتينه كرن، نۆكه وه‌لاتێن فه‌ره‌نسا و پورتۆگال دادوه‌رێن خۆ یێن ڤه‌كۆلینێ هنارتینه هه‌رێما كوردستانێ ژ پێخه‌مه‌ت كۆمكرنا به‌لگه‌یان و وه‌رگرتنا دانپێدانێن ڕزگاربوویێن ئێزدى ژ ده‌ستێ داعشێ.
هورمى ئاشكه‌راكر: ل سه‌ر ئاستێ جیهانێ روودانێن گه‌رمتر د رۆژه‌ڤێ دا هه‌نه ، دڤێت ئێزدى ديڤچۆنێ بكه‌ن وب رژدى كار ل سه‌ر ناساندنا كۆمكوژیێ ل سه‌ر ئاسته‌كێ بلند بكه‌ن.
تيرۆرستێن داعش ل 3ى ته‌باخا 2014ێ هێرش كره ده‌ڤه‌را شنگالێ و ئێزدى جينۆسايد كرن، د وێ هێرشێ دا ب هه‌زاران وه‌لاتيێن ئێزدى هاتنه كوشتن و گرتن و ده‌ربه‌ده‌ركرن، هه‌روه‌سا زێده‌ترى 2 هه‌زار زارۆيێن ئێزدى سێوى مان.
ل گۆڕه‌ى داوى ئامارا نڤيسينگه‌ها رزگاركرنا گرتيێن ئێزدى، هێشتا چاره‌نڤيسێ زێده‌ترى دوو هه‌زار گرتيێن ئێزدى يێ ديار نينه.