سه‌ما
کۆمیسیونا مافێن مرۆڤی یا عیراقێ ئيرۆ سێ شەمبووێ ئاشکرا کر، ب لايه‌نێ كه‌م مەهانە هەتا 150 سکالایێن زەلامان تۆمار دکەن کو ژ لایێ ژنان ڤە توندوتیژی ل دژی وان دهێتە کرن.
سەلاح مەهدی ژ کۆمیسیونا مافێن مروڤی یا عیراقێ راگەهاند: هەرچەندە ئامارەکا دروست یا توندوتیژیێ ل دژی زەلامان ژ لایێ ژنان ڤە ل بەر دەست نینە، لێ ل گۆؤ وان سکاله‌یێن ل بنگەهێن پۆلیسان دئێنە تومارکرن، مەهانە 150 زەلام رووبرووى توندوتیژیێ دبن.
هەروەسا وی راگەهاند: ژ ڤێ ژمارێ ب تنێ رێژەیا 13% یا توندوتیژیان ژ لایێ هەڤژینان ل دژی مێرێن خوە دئێنە ئەنجامدان.
دیسان وی گۆت: بەشەک ژ وان توندوتیژیان یێن ل دژی زەلامان لێدانێ ژی دگریت کو ژ لایێ هەڤژین یان مالباتا ژنێ، هەتا ژ لایێ زارۆکێن وان ڤە ژی دئێنە ئەنجامدان.
ئەندامێ کۆمیسیونا مافێن مرۆڤی یا عیراقێ ڤەنەشارت کو ئاگەهداریا وان هەیە کو رێژەیا ئەنجامدانا توندوتیژیێ ل دژی زەلامان گەلەک ژ وێ زێدەترە کو دئێتە بەلاڤکرن، ب شێوەیەکی کو هندەک جاران سکالا نائێتە تۆمارکرن و گەلەک جاران ژی ب سەدەما ناڤبژیڤانیا مالبات و خزم و کەسوکاران ڤە کێشە دئێنە چاره‌كرن.
ل گۆڕ راپۆرتێن جیهانی ژی، ئێک ژ سێ زەلامان ژ لایێ ژنان ڤە توندوتیژی ل دژی وان دئێتە کرن کو خوە د رەفتارا خراب و هەرس بوون و ئازاردانێ دا دبینیت، لێ بەشێ هەرە زۆر یێ ڤان توندوتیژیان نائێنە تۆمارکرن یان وەک سکالا نائێنە بلندکرن.