سه‌ما
ئيرۆ ڕۆژا سێ شەمبوويێ 3ى ئيلۆنا 2024ێ، ل سەلاحەددین سەرۆك مەسعود بارزانی پێشوازی ل ئانیل بورا ئینان، بالیۆزێ نوو یێ توركیا ل عیراقێ كر.
د دیدارێ دا دانوستاندن ل دۆر ڕەوشا سیاسییا عیراق و دەڤەرێ هاتەكرن و بالیۆزێ نوو یێ توركیا ل عیراقێ خۆشحالییا خۆ بۆ دەستبكاربوونێ وەك بالیۆز ل عیراقێ بۆ سەرۆك بارزانی دیاركر و خواستا وەلاتێ خۆ ژی بۆ بەرفرەهكرنا پەیوەندییان ل گەل عیراق و هەرێما كوردستانێ دووپات كر، ب تایبەت د بیاڤێ ئابووری و بازرگانی و هەماهەنگییا دناڤبەرا هەردوولایاندا.
بالیۆزێ نوو یێ توركیا ل عیراقێ ب هویری بەحس ل تاوانا كوشتنا گەشتیارەكێ هەرێما كوردستانێ ل توركیا كر و سەرەخۆشی و هەڤخەمییا خۆ بۆ سەرۆك بارزانی و كەسوكارێن ئەوی قوربانی دیاركر و ڕاگەهاند، لایەنێن پەیوەندیدار یێن توركیا دویڤچوونا تەمام بۆ ڕویدانێ كرییە و ڕێكارێن یاسایی گرتینەبەر و هەمی تاوانبار هاتینە دەستەسەركرن و ب پشتڕاستیڤە تاوانبار ب یاسایی دێ سزایێ خۆ وەرگرن.
ژ لایێ خۆڤە سەرۆك بارزانی هیڤییا سەركەفتنێ بۆ بالیۆزێ نوو یێ توركیا ل عیراقێ خواست و دووپات ل گرنگیدانا پەیوەندی و هەماهەنگییا دناڤبەرا هەرێما كوردستانێ و توركیا كر.