سه‌ما
وەزارەتا پلاندانانا عیراقێ ئاشکرا دکەت، ل گۆر پێشبینیان ژمارا نۆکە یا ئاكنجيێن عیراقێ دێ 43 ملیۆن کەس بت.
عەبدولزەهرە ئەلهنداوی په‌يڤدارێ وەزارەتا پلاندانانا عیراقێ د کۆنگرەیەکێ رۆژنامەڤانی دا راگەهاند: ب پشتبەستن ب خەملاندنێن ساڵا 2023ێ، تێ پێشبینیکرن کو ژمارا ئاكنجيێن نوکە یێن عیراقێ گەهشتبتە 43 ملیۆن کەسان.
هەروەسا راگەهاند: ژ ڤێ ژمارێ رێژا نێر دگەهتە 50.5% و رێژا مێ دگەهتە 49.5% ژ کۆما گشتى یا ژمارا ئاكنجيێن عیراقێ.
دەربارەى سەرژمێریێ، په‌يڤدارێ وەزارەتا پلاندانانێ گۆت: د فۆرما سەرژمێریێدا ب تو رەنگان نەتەوە و مەزهەب نائێنە دیارکرن، تنێ ئۆل دێ ئێتە دیارکرن.
هەروەسا ئاماژە ب وێ چەندێ دا کو د سەرژمێریێدا ئاستێ ژیانا وەلاتیان دێ ئێتە دیارکرن، دا چاڤێ حکومەتێ رۆهن بت هەتا ژ ڤێ رێکێ چارەسەریا خرابیا ژیانا وەلاتیان بێتە کرن.
بڕیارە وەزارەتا پلاندانانا عیراقێ د رۆژێن 20 و 21ێ مەها 11ێ ئيساله، سەرژمێریەکا گشتى ل سەرانسەرى عیراقێ ب هەرێما کوردستانێ ڤە ئەنجام بدەت.