سه‌ما
سەرۆکێ ناڤەندا ستراتیژى یا مافێن مرۆڤى فازل غەراوى دیار کر کو ژمارا کرێکارێن بیانى ل گۆر نیشاندەران گەهشتیە ملیۆنەک کرێکاران یێن ب شێوەیەکى نە یاسایى کار دکەن.
غەراوى د به‌ياننامه‌يه‌كێ راگه‌هاند، کو ژمارا کرێکارێن بیانى یێن تۆمارکرى ل وەزارەتا کارى د سالا 2024 دا گەهشتیە 43 هه‌زار کرێکاران.
وى دیار کر کو ناڤنجیا مووچێ کرێکارێ بیانى ل عیراقێ 700 دۆلارە، ل دەمەکى دا کێمترین مووچێ کرێکارێ ناڤخۆیى 270 دۆلار ە. هەروەها ئاماژە دا کو رێژا بێکاریێ یا کرێکاران ل عیراقێ ب بەراورد دگەل کرێکارێن بیانى یێن نە تۆمارکرى گەهشتیە 26%.
غەراوى گۆت کو رێژا کرێکارێن عیراقى یێن تەمەنێ وان د ناڤبەرا 15-24 سالان دا د سالا 2023 دا گەهشتیە 34%، و رێژا بێکاریێ د ناڤ واندا 15.5% یە. ل سالا 2022 رێژا هێزا کارى 35% بوو ب رێژا بێکاریەکا زێدەتر ژ 16%، و ل سالا 2021 رێژا هێزا کارى یا گروپا تەمەنى 15-24 سال 36.8% بوو ل بەرامبەر رێژا بێکاریێ 16.23% و رێژا دامەزراندنێ 35%.
غەراوى ئاماژە دا کو کرێکارێن بیانى یێن تۆمارکرى سالانە 600 ملیۆن دۆلاران وەک دراڤێ بیانى دهنێرنه دەرڤەى عیراقێ، ل دەمەکى دا کرێکارێن بیانى یێن نە تۆمارکرى سالانە 4 ملیار و 200 ملیۆن دۆلاران ژ دراڤێ بیانى دهنێرنه دەرڤە، کو ئەڤە زیانێ ددەتە ئابۆریا نیشتمانى.
غەراوى رۆنکر ژى: کو هاتنا کرێکارێن بیانى بۆ عیراقێ ب رێیا قاچاخچیتیێ یان ب رێیا باندێن بازرگانیکرنێ ب مرۆڤان یان ب ڤیزەیا گەشتیارى یان ب رێیا دەستوورێن وەبەرهێنانێ ب ناڤێ پسپۆران دهێن، و پرانیا وان کرێکارن نە شارەزا نە و پرانیا وان ژ وەلاتێن بەنگلادش و پاکستان و هندستان و سوریا نە.
غەراوى داخواز ژ حکومەتێ و پەرلەمانێ کر کو یاسایا کارى بهێتە گوهۆرین و سزایێن کۆمپانیا و دەزگەه و پرۆژێن کو کرێکارێن بیانى یێن بێ مۆلەت ددەن کارکرنێ بهێنە توندکرن.