سه‌ما
وەکى بەرى نها هاتیە بەلاڤکرن بریارە د ماوەیێ ڤێ مەهێ دا مەسعوود پزیشکیان، سەرۆکێ ئیرانێ سەرەدانا عیراقێ بکەت.
ژێدەرەک ل سەرۆکاتیا ئیرانێ ئاشکرا کر کو چارشەمبیا داهاتى پزیشکیان ب فەرمى سەرەدانا بەغدایێ دکەت، د یەکەم سەرەدانا خوە دا بۆ دەرڤەى وەلاتێ خوە.
ل گۆر ژێدەرى پزیشکیان د وێ سەرەدانێ دا دگەل بەرپرسێن بلند یێن عیراقێ کۆم دبت و چەندین یاداشتێن لێکتێگەهشتنێ د بوارێن جودا جودا دا ئیمزا دکەن، ئەگەر ژى هەیە هەر د وێ سەرەدانا خوە دا بۆ عیراقێ جودا ژ جهێن پیرۆز یێن شیعە ل کەربەلا و نەجەف، سەرەدانا هەولێرێ و هەرێما کوردستانێ بکەت.
بەرى نها میدیایێن ئیرانێ بەلاڤ کربوون کو بریارە د مەها ئیلونێ دا مەسعوود پزیشکیان، سەرۆکێ ئیرانێ سەرەدانا عیراقێ بکەت، وەکى یەکەم سەرەدانا وى بۆ دەرڤەى وەلاتێ خوە، کو ب هەڤالینیا شاندەکێ بلند ل سەر داخوازنامەیەکا فەرمى یا محەمەد شیاع سوودانى، سەرۆک وەزیرێن عیراقێ سەرەدانا بەغدایێ دکەت، بەرى گەشتا خوە بۆ نیویۆرکێ.
محەمەد کازم ئال سادق، بالیۆزێ ئیرانێ ل عیراقێ د وى بارى دا دووپات کر، سەرەدانا پزیشکیان بۆ عیراقێ سێ رۆژا (11، 12، 13)ێ ئیلونێ ڤه‌دکێشیت، کار ژى بۆ هندێ دهێتە کرن کو سەرەدان جودا ژ بەغدا و نەجەف و کەربەلا، هەرێما کوردستانێ و بەسرا ژى بگریت، د وێ سەرەدانێ دا پتر ژ 30 رێککەفتن د ناڤبەرا هەردوو وەلاتان دا د بوارێن ئابوورى و بازرگانى و ئەمنى دا دێ هێنە ئیمزاکرن.