سه‌ما
بنگه‌هێ لالش يێ ڕه‌وشه‌نبيرى و كۆمه‌ڵايه‌تى ل دهۆكێ و رێڤه‌به‌ريا گشتى يا پهروهردهيا دهۆكێ، ليژنه‌يه‌ك پێكئينان بۆ دانانا ميكانيزمه‌كێ بۆ هندێ رزگاربوويێن ئێزدى ژ ده‌ستێ داعشێ خواندنا خۆ بێ به‌رامبه‌ر ته‌مام بكه‌ن و ب داوى بينن.
ل رۆژا سێ شه‌مبوويێ 3ى ئيلۆنا 2024ێ، شانده‌كێ بنگه‌هێ لالش ب سه‌رۆكاتيا “د.سه‌عيد خودێدا” جێگرێ سه‌رۆكێ بنگه‌هێ لالش و ئه‌ندامه‌تيا “د.منيب سه‌يدۆ “به‌رپرسى پشكا قوتابيان ل بنگه‌هى و “ئيمان عبدالله” و “فايزا كه‌مال” وه‌ك نوونه‌رێن رزگاربوويان سه‌ره‌دانارێڤه‌به‌ريا گشتى يا پهروهردهيا دهۆكێ كرن و ژلايێ “عه‌مه‌ر عه‌لى” رێڤه‌به‌رێ په‌روه‌ردێ ڤه هاتنه پێشوازيكرن.
د.سه‌عيد خودێدا، جێگرێ سه‌رۆكێ بنگه‌هێ لالش بۆ سه‌ما راگه‌هاند: پشتى ئه‌و بريارا هاتيه دان ژلايێ ئالان حه‌مه وه‌زيرێ پهروهردهيا حكومه‌تا هه‌رێما كوردستانێ ده‌رفه‌ت بێته دان ژبۆ رێگه‌پێدان ب وان رزگاربوويێن ئێزدى ئه‌ڤێن خواندنا خۆ ب داوى بينن، پشتى فه‌رمانا وه‌زارى ژ وه‌زاره‌تا په‌روه‌ردێ ده‌ركه‌فتى ئێدى ليژنه‌يه‌ك هاته دروستكرن ل په‌روه‌ردا گشتى يا دهۆكێ ئه‌و ليژنه بۆ جێبه‌جێكرنا بريارا جه‌نابێ وه‌زيرێ په‌روه‌ردێ، مه وه‌ك بنگه‌هێ لالش بۆهندێ كو ليست بێنه دروستكرن سه‌ره‌دانا رێڤه‌به‌ريا گشتى يا پهروهردهيا دهۆكێ كر و ل گه‌ل وێ ليژنێ روونشتينه خوارێ ئه‌و بوو ئه‌پليكه‌يشنه‌ك فۆرمه‌كا ئه‌ليكترۆنى هاته دروستكرن، ئه‌ڤ فۆرمه ل نێزيك دێ ئێته راگه‌هاندن ژبۆ هندێ ئه‌و كه‌سێن دڤێن خواندنا خۆ ژ رزگابوويان ب داوى بينن دێ ناڤێن خۆ نڤيسن و كۆمه‌كا پێزانينا يا تێدا پركه‌ن.
جێگرێ سه‌رۆكێ بنگه‌هێ لالش ئاماژه ب وێ چه‌ندێ دا، ليسته ل بنگه‌هێ لالش دێ ئێنه دروستكرن و ره‌وانه‌كرن ژبۆ په‌روه‌ردا گشتى ل دهۆكێ و ميكانيزمه‌ك ئێته دانان كو ب چ ميكانيزم خواندنا خۆ ب داوى بينن، ژبه‌ركو دبت هنده‌كا خواندنا وان ب زمانێ عربى بت يان هنده‌ك هه‌بن بچنه خواندنا ئێڤاريان و خواندنا بله‌ز هه‌بن، ره‌نگه هنده‌ك ژى هه‌بن نه‌خوێنده‌وار بن بۆ وان ژى بێته ڤه‌كرن و پاشى ده‌رفه‌ت بێته دان هه‌تا خواندنا خۆب داوى بينن.
د.سه‌عيد خودێدا رۆنكر، ل سه‌ر په‌روه‌ردێ ڤه ژى مه هنده‌ك په‌يمانگه‌هـ وه‌كى كۆمپيۆتر، وه‌رزش و هۆنه‌رى هه‌نه ئه‌وێن پۆلا سێيێ ب داوى ئيناين ئه‌و‌ان ژى ماف هه‌يه بێنه وه‌رگرتن پشتى ليسته دروست دبن كو دڤێن ل چ په‌يمانگه‌هێ بخوونن، ديسان ئه‌و رزگاربوويێن د وه‌ختێ خۆ دا پۆلا شه‌شِێ ئاماده‌يى ب هه‌ردوو به‌شێن خۆ ڤه ب داوى ئيناين دێ ل زانكۆيان ئێنه وه‌رگرتن و ب تايبه‌ت ژى ل زانكۆيێن ئه‌هلى.
هه‌روه‌سا ئاشكراكر: پشتى رزگاربووى دئێنه وه‌رگرتن خواندنا وان دێ يا بێ به‌رامبه‌ر و مه‌رج بت.
