سه‌ما
ریڤه‌به‌رێ كۆچ و كۆچبه‌ران و به‌رسڤدانا قه‌یرانان ل دهۆكێ راگه‌هاند؛ كرێيا ئه‌ردێ چار سالێن كه‌مپێن ئاواره‌يان ل سنوورێ پارێزگه‌ها دهۆكێ ژلايێ حكومه‌تا هه‌رێما كوردستانێ ڤه دێ ئێته دان.
پير ده‌يان جه‌عفه‌ر،رێڤه‌به‌رێ كۆچ و كۆچبه‌ران و به‌رسڤدانا قه‌یرانان ل دهۆكێ بۆ سه‌ما دیاركر:” ژ سالا 2017ێ وه‌ره كرێيا ئه‌ردێ كه‌مپان ل سنوورێ پارێزگه‌ها دهۆكێ و ئيدارا سه‌ربه‌خۆ يا زاخۆ ژلايێ حكومه‌تا عيراقێ ڤه نه‌هاتيه دان، له‌وا حكومه‌تا هه‌رێمێ خۆ ل ڤى بابه‌تى كريه خودان و نۆكه پارێزگه‌ها دهۆكێ ره‌زامه‌ندى دايه و ليژنه‌يه‌ك پێكئينايه بۆ ته‌رخانكرنا كرێيا ئه‌ردێ چار سالێن كه‌مپان”.
گۆت ژى: ل سنوورێ پارێزگه‌هێ 14 كه‌مپێن ئاواره‌يان ل ناڤا عه‌ردێن جۆتياران هاتينه دروستكرن، دڤێت سالانه كرێيا وان بێته دان.
پشتى ده‌ربازبوونا 10 سالان ل سه‌ر جينۆسايدا ئێزديان ل شنگالێ ل سه‌ر ده‌ستێ تيرۆرستێن داعشێ، هێشتا ب هه‌زاران خه‌لكێ شنگالێ ل ناڤا كه‌مپێن ئاواره‌يێ دا ل هه‌رێما كوردستانێ و ب تايبه‌ت ل دهۆكێ ژيانا خۆ ده‌رباز دكه‌ن.
ماوێ چه‌ند سالانه هاريكاريێن حكومه‌تا عيراقێ و ريكخراوێن مرۆڤى بۆ ئاواره‌يان ل كه‌مپان كێم بووينه و ل ئاستێ پێدڤى دا نينن، ل هه‌مبه‌ر دا حكومه‌تا هه‌رێما كوردستانێ ئه‌ركێ دابينكرنا سكته‌رێن سه‌ره‌كى يێن ژيانێ ب ستۆيێ خۆ ڤه گرتينه.
حکومەتا هەرێما کوردستانێ بەردەوام ته‌كه‌ز و به‌رهه‌ڤيا خۆ نيشاندايه هه‌ڤكاريا حکومەتا فیدراڵ بکه‌ت بۆ ڤه‌گەڕيانا ئاواران ب مەرجەكی زامنی سەقامگیریا ده‌ڤه‌ر و مافێن وان بێته كرن.
ل گۆڕه‌ى بۆچۆنا ئاواره‌يان هه‌رێما كوردستانێ په‌ناگه‌ها ڤه‌حه‌واندنا ئاواره‌يان بوويه و گه‌ل و حكومه‌تێ ژ هه‌موو ئاليان ڤه هارياريا وان كريه.