سه‌ما
لدووڤ بريارا جڤاتا روحانى يا بلند يا ئێزديان، هه‌ر كه‌س و خێرخوازه‌كێ مه‌زارگه‌هـ و نيشانگه‌هێن ئۆلى ل كوردستانێ و ژ ده‌رڤه ئاڤا بكه‌ت، پێدڤيه ره‌زامه‌نديا جڤاتێ وه‌رگرت.
سه‌باح سمير، به‌رپرسێ راگه‌هاندنا بابێ شێخ بۆ سه‌ما راگه‌هاند: هه‌ر نيشانگه‌هـ يان مه‌زارگه‌هه‌كێ ئێزديان چ ل كوردستان و عيراقێ يان ژ ده‌رڤه‌ى وه‌لاتى بت، وه‌ك ريوه‌سم و ئه‌ركه‌ك فه‌ره ل سه‌رى دا ده‌ستوورى ژ بابێ شێخ و جڤاتا روحانى يا ئێزديان بێته خواستن بۆ وى جهى ب تايبه‌ت ژى ئه‌گه‌ر ئه‌و جهـێ پيرۆز يێ ئاڤاكرى ژى بت هه‌ر ديسان بابێ شێخ و جۆقه‌تا خۆ به‌رهه‌ڤ دبن ل وان رێوره‌سمان.
ب گۆتنا به‌رپرسێ راگه‌هاندنا بابێ شێخ، نابت هه‌ر كه‌سه‌ك ژ ره‌خێ خۆ ڤه رابت نيشانگه‌هه‌كا نووكا ئاڤا كه‌ت، به‌لكو بابێ شێخ جه‌خت ل وێ يه‌كێ كريه كو دڤێت پێشوه‌خت ئه‌و ده‌ڤه‌ر يان هه‌ر كه‌سه‌كێ ب وى كارێ خێرخوازى رادبن بۆ ئاڤاكرنا نيشانگه‌هـ و مه‌زارگه‌هان سه‌ره‌دانا جڤاتا روحانى بكه‌ن و ره‌زامه‌نديێ بستينت.
سه‌باح سمير گۆتژى: ل ده‌رڤه‌ى وه‌لات نۆكه ره‌ڤه‌ندا ئێزدىان ل وه‌لاتێن ئيزدى لێ ئاكنجى ده‌ما گۆڕستانه‌كێ دروست دكه‌ن تێته خواستن ده‌ستووريێ ژ جڤاتا رۆحانى بێته ستاندن، ئه‌و ژى ب رێوره‌سمن بابه شێخ و جۆقه‌تا خۆ به‌رهه‌ڤ ببن و ب دوعا و درۆزه ده‌ستوورى بێته دان دا ئه‌و كاره بێته كرن.
هه‌روه‌سا گۆت: هيڤيدارين ده‌مێ خه‌لكێ مه ب كارێ ئاڤاكرنا جهێن پيرۆزێن ئێزديان رادبن سه‌رو سيمايێ كه‌ڤناريا وان مه‌زارگه‌هان بێته پاراستن و ده‌ربرينێ ژ ئێزدياتى و سمبولێن ئێزدياتيێ بكه‌ن.