سه‌ما
ل سنوورێ ناحيا خانكێ ب كوژمێ زێده‌ترى 10 مليار دينارا كار ل سەر هەژمارەكا پڕۆژەیێن خزمەتگوزاری دئێتە كرن و پڕانیا وان ژی بەر ب قۆناغێن داویێ نە.
ئه‌ندازيار خێرى جه‌عفه‌ر، سه‌رۆكێ باژێرڤانيا خانكێ بۆ سه‌ما دبێژت: هەژمارەكا پڕۆژەیێن خزمەتگوزاری كو چێكرن و قێركرنا جادده‌يێن ناڤخۆيى و چه‌ند پرۆژێن دى بخۆڤه دگرت دئێنە بجهئینان و پڕانیا وان ژی بەر ب قۆناغێن داویێ نە، پێشكێشكرنا خزمەتگۆزاریان ب هەموو سێكتەرێن خۆڤە ل سەر راسپاردا مەسروور بارزانی، سەرۆكێ حوكمەتا هەرێما كوردستانێ دێ بەردەوام بن.
سه‌رۆكێ باژێرڤانيا خانكێ خوياكر، نۆكه ده‌ست ب چێكرنا نێزيكى 97 جادده‌يێن ناڤخۆيێ هاتيه كرن و هنده‌ك ژى هاتينه قێركرن و پێنج به‌لێنده‌ر ل سه‌ر ڤان پرۆژه‌يێن جاددا كار دكه‌ن.
دوپاتكر، ب چێكرنا ڤان پرۆژه‌يان بێگۆمان دێ كاریگه‌ریه‌كا باش هه‌بت ل سه‌ر ژیانا خه‌لكێ ده‌ڤه‌رێ و هاریكاریا گه‌شه‌پێدانا ئابووری كه‌ت.
ژ ئاليێ خۆ ڤه زه‌رده‌شت شێخ شامۆ، رێڤه‌به‌رێ ناحيا خانكێ بۆ سه‌ما راگه‌هاند، پشتی 13/6/2022ێ، ده‌مێ كۆمه‌لگه‌ها خانكێ بوویه ناحيه حكومه‌تا هه‌رێما كوردستانێ كوژمێ 10 ملیار و 421 ملیۆن و 452 هه‌زار دینارا بۆ ئه‌نجامدانا چه‌ندین پرۆژان ل سنوورێ ده‌ڤه‌رێ ته‌رخانكرن، نێزیكی 5 ملیار دینارا ژ ڤى كوژمه‌ى بۆ چێكرن و قێركرنا جادده‌يێن ناڤخۆيى هاتيه ته‌رخانكرن.
ئاماژه ب وێ چه‌ندێ دا پرۆژه د هه‌موو سێكته‌ران دا دئێنه ئه‌نجامدان، ئه‌و ژى نووژه‌نكرن و ئاڤاكرنا قوتابخانان، رێڤه‌به‌ریێن حكومی و هۆلێن تازیان و چێكرنا جادده‌يان بخۆڤه دگرت و گه‌له‌ك ژى كه‌فتينه دخزمه‌تا وه‌لاتيان دا.
ئه‌ڤ پێنگاڤه نیشان دده‌ت كو حكومه‌تا هه‌رێما كوردستانێ گرنگیه‌كا تایبه‌ت دده‌ته ئاڤه‌دانكرنا ناحيا خانكێ، و هه‌ول دده‌ت باره‌كێ باشتر بۆ ئاكنجيێن وێ ده‌ڤه‌رێ پێك بینت و ژیانا وه‌لاتیان باشتر بكه‌ت و خزمه‌تگۆزاریان بۆ هه‌موو ده‌ڤه‌ران پێشكێش بكه‌ت.