سه‌ما
به‌رپرسێ پشكا په‌يوه‌نديان ل بنگه‌هێ لالش ل دهۆكێ راگه‌هاند، وه‌كو بنگه‌هێ لالش تایی و نڤیسینگه‌هێن خۆ سه‌رپشك كرینه به‌رده‌وام دناڤ خه‌لكی دابن و گۆهداريا گله و گازندێن وان بكه‌ن، داكو بگه‌هيننه جهێن په‌يوه‌نديدار.
د.فارس كتى، به‌رپرسێ پشكا په‌يوه‌نديان ل ده‌سته‌يا بلندا بنگه‌هێ لالش ل دهۆكێ بۆ سه‌ما دبێژت: هه‌ر ژ ده‌مێ ده‌ست ب كاربووين وه‌كو پشكا په‌یوه‌ندییان به‌رده‌وام كار ل سه‌ر پێشڤه‌برن و خورتكرنا په‌يوه‌نديان دگه‌ل سازيێن حكومى و ڕه‌وشه‌نبيرى و سازيێن سڤيل و ته‌خ و چينێن جڤاكى دكه‌ين، پلانا مه یا ستراتیژی په‌یوه‌ندیێن بنگه‌هێ لالش دناڤ جڤاكێ ئێزدی دا د خێر و خۆشی و نه‌خۆشیان دا د ئاسته‌كێ باش دابن، مه تایی و نڤیسینگه‌هێن خۆ سه‌رپشك كرینه دناڤ خه‌لكی دا بن و گۆهداريا گلی و گازندێن وان بكه‌ن و بگه‌هیننه ده‌سته‌یا بلند داكو ئه‌م بكارین خزمه‌تا وان بكه‌ین و بلند بكه‌ين بۆ جهێن په‌يوه‌نديدار بۆ چاره‌كرنا كێشه‌يان.
گۆت ژى : ل سه‌ر ئاستێ داموده‌زگه‌هێن میری و وه‌زاره‌تان ل هه‌رێما كوردستانێ و رێكخراوێن ( NGO) و سازيێن جڤاكا سڤيل، ل سه‌ر ئاستێ نیڤده‌وله‌تی ژی مه دگه‌ل پشكه‌ك ژ سازیێن ئێزدییان ل دیاسپۆرایێ په‌یوه‌ندی دروستكرینه، ده‌رئه‌نجامێ وێ چه‌ندێ ياداشتنامه‌يه‌ك دناڤبه‌را بنگه‌هێ لالش و مالا ئێزدیان ل ئۆلندبۆرگ و سەنتەرێ ڤەکۆڵینێن ئێزدیناسیێ ل زانکۆیا لایپزیگ ل ئه‌لمانيا هاته ئيمزاكرن، زێده‌بارى ب سه‌دان سه‌ره‌دانان كرینه و نێزیكی وێ ژمارێ ژی مه پێشوازی كرینه.
ئاماژه ب وێ يه‌كێ ژى كر، پشكا په‌یوه‌ندییان ل سه‌ر خه‌ته دگه‌ل هه‌موو نڤیسه‌رێن ئێزدی، ژبه‌ر مه ل بنگه‌هێ لالش پرۆژێ ستراتيژى يێ ئينسكلۆپیدیا نڤيسه‌رێن ئێزدى هه‌يه، وه‌ك نوونه‌رێ پشكێ ئه‌ندامن دليژنه‌يا پرۆژيى دا ب رۆلێ خۆ رادبين بۆ ئاگه‌هداركرنا هه‌موو نڤيسه‌رێن ئێزدى بۆ پشكداريكرنێ دئينسكلۆپيديايێ دا.
بنگه‌هێ لالش ئێكه ژ مه‌زنترين ناڤه‌ندێن ڕه‌وشه‌نبيرى و كۆمه‌ڵايه‌تى ل هه‌رێما كوردستانێ و سه‌رانسه‌رى جيهانێ، نێزيكى هه‌فت هه‌زار ئه‌ندامان هه‌نه، هه‌روه‌سا نه‌هـ تايى ل ده‌ڤه‌رێن شێخان، شنگال، باشيك و به‌حزانێ و شاريا و خانكێ و چه‌ندين نڤيسينگه‌هـ ل گوند و كۆمه‌لگه‌هێن ئێزديان هه‌نه.