سه‌ما
تەیف سامى وەزیرا دارایيا عيراقێ دياركر، جڤینا هەڤبەش یا شاندێ ئەنجومەنا وەزاریا ئابوورى دگەل ئەنجومەنا ئابوورى یا هەرێما کوردستانێ دۆسه‌يێن دارایى یێن هەڤبەش گفتوگۆ کرن، بۆ گەهشتن ب چارەسەریان بۆ پرسێن دارایى یێن پەیوەندیدار د ناڤبەرا هەردوو لایان دا.
وەزارەتێ د داخویانیەکێ دا راگه‌هاند: جڤینێن دوو قۆلى د ناڤبەرا ئەنجومەنا وەزاریا ئابوورى و ئەنجومەنا ئابوورى یا هەرێما کوردستانێ یێن بەردەوام ل هەولێرێ دەستپێکرن، ب ئامادەبوونا سەرۆکێ حكومه‌تا هەرێمێ مەسرور بارزانى، کو گفتوگۆ ل سەر مێکانیزمێن بهێزکرنا هەڤکاریا دارایى د ناڤبەرا هەردوو لایان دا و گەهشتن ب چارەسەریێن بەردەوام بۆ پرسێن دارایى یێن هه‌لاويستى.
هەروەسا ئاماژە ب وێ چەندێ دا کو “گفتوگۆ د چارچوڤەیا هەولێن حکومەتێ دا نە یێن ئارمانجا وان بهێزکرنا هەڤکاریێ یە د ناڤبەرا حکومەتا فیدڕاڵ و هەرێما کوردستانێ دا، و دۆسه‌یێن دارایى یێن هەڤبەش وەکى مووچێن فه‌رمانبه‌رێن هەرێمێ و بودجەیا هەرێمێ و دەروازێن سنوورى ل گەل هەماهەنگکرنا سیاسەتێن گومرگى و باجى ژ گرنگترین پرسێن کو کاریگەریێ ل سەر سەقامگیریا ئابووریا عیراقێ دکەن”.
وەزیرا دارایى خوياكر، گفتوگۆ دەرفەتەکا دیرۆکى نە بۆ بدەستڤەئینانا لێکتێگەهشتنا دارایى د ناڤبەرا حکومەتا فیدڕاڵ و هەرێما کوردستانێ دا”، و جەخت ل سەر “گرنگیا بهێزکرنا هەڤکاریا دارایى د ناڤبەرا هەردوو لایان دا و گەهشتن ب چارەسەریێن بەردەوام بۆ پرسێن دارایى یێن بەردەست” کر.
هەروەسا ئاماژە ب وێ چەندێ دا کو “د هەمان دەم دا رێککەفتن ل سەر مێکانیزمەکا دادپەروەر بۆ دابەشکرنا داهاتێن نەفتێ و دەروازێن سنوورى دێ هاریکاریێ کەت د بهێزکرنا متمانە و سەقامگیریا ئابوورى د وەلاتى دا”.