سه‌ما
جڤاتا وەزاری بۆ ئابووری د دەمێ دوو رۆژان دا، کۆمبوونا خۆ یا 28ــێ دگەل جڤاتا ئابووری یا هەرێما کوردستانێ ل باژێرێ هەولێرێ سازکر.
د دەمێ دوو ڕۆژێن کۆمبوونێدا، دانوستاندن ل سەر کۆمەکا بابەتێن جهێ گرنگی پێدانا هەڤپشک دناڤبەرا حکومەتا فیدڕال و حکومەتا هەرێما کوردستانێ دا، د سەقایەکێ ئەرێنی دا هاتە کرن، کو بڕیارا هەنوکەیی دەربارەی هندەک ژ وان هاتە دان و ئەوێن دی ژی وەک ڕاسپاردە بۆ جڤاتا وەزیرێن فیدڕال هاتنە ئاراستەکرن و دووپاتی ل بەردەوامبوونا دانوستاندنان هاتە کرن بۆ چارەسەرکرنا ئەوان پرسێن کۆ پێدڤی ب کۆمبوون و دیدارێن زێدەتر هەیە.
جڤاتا وەزاریی بۆ ئابووری بڕیار دا ب پێشکێشکرنا ڕاسپاردەیەکێ بۆ جڤاتا وەزیرێن فیدڕال بۆ ئاراستەکرنا وەزارەتا دارایی یا فیدڕال بۆ چارەسەرکرن و هنارتنا مووچەیێن ڕاگرتی یێن هەرێما کوردستانێ، ئەوێن ژ ئەگەرێ تمام نەکرنا بایۆ مەتری هاتینە دوورخستن.
هەروەسا دانوستاندن دەربارەی هندەک پرسێن پەیوەندیدار ب سکتەرێن چاندنێ، مۆلەتا هنارتن و ئینانێ، مۆلەتا کارگەهان، تۆمارکرنا کۆمپانییان، پۆلینکرنا بەڵێندەران، دەرگەهێن سنووری، گۆمرک، دۆسییەیێن نەفت و وزە و کەرتێ بانکی هاتنە کر.
ڕاسپاردەیەکا دی یا جڤاتا وەزاری بۆ ئابووری، بەردەوامبوونا کارکرنا لژنەیێن هەڤپشک یێن دناڤبەرا وەزارەت و کەرتێن پەیوەندیدار بۆ تمامکرنا ئەوان ئەرکێن پێ هاتینە دان ژ پێخەمەت گەهشتن ب لێکتێگەهشتنا هەڤپشک کو د بەرژەوەندییا هەمی وەلاتییێن عیراقێ دا بیت.
هەروەسا جڤاتا وەزاری پێشنیارا ئەنجامدانا کۆمبوونەکا تایبەت و د ئاستەکێ بلند دا دکەت بۆ دانوستاندنێ دەربارەی دۆسیەیێن نەفت و وززێ و دەرگەهێن سنووری وگۆمرکان.
ل دووماهییێ جڤاتا ئابووری یا هەرێما کوردستانێ هاتە داخوازکرن بۆ ئەنجامدانا کۆمبوونەکا هەڤپشک دگەل جڤاتا وەزاریی بۆ ئابووری، ل باژێرێ بەغدا.
