سه‌ما
ئێکەتیا ئەورۆپا پێشوازییا بڕێڤەچوونا ھەڵبژارتنا پەرلەمانێ کوردستانێ کر و داخواز ژی كر، ب زوویترین دەم حکوومەتا نوی بهێتە پێکانین.
نوێنەراتیا ئێکەتیا ئەوروپا ل عێراقێ د پەیامەکێدا پێشوازییا سەرکەفتنا پرۆسا ھەڵبژارتنا پەرلەمانێ کوردستانێ کر و ڕاگەهاند ئێکەتیا ئەوروپا خۆشحاڵە پشتی دوو ساڵێن پاشخستنێ ھەڵبژارتن بڕێڤەچوو.
هه‌روه‌سا دبێژیت: “ھەڵبژارتن کلیلا دەربڕینا ویستا سیاسییا خەلکییە”.
پشترە ئێکەتیا ئەوروپا تەکەز لسەر وێ ئێکێ کر ئەو ب بهاڤە دنێرنە پەیوەندیێن خۆ دگەل ھەرێما کوردستانێ و داخوازێ ژی دکەت کۆ ب زوویترین دەم پەرلەمانێ نوی کارێن خۆ دەست پێ بکەت.
ھەروەسا ئێکەتیا ئەوروپا داخوازێ ل هەمی لایەنێن سیاسیێن کوردستانێ دکەت کۆ ب زوویترین دەم حکوومەتا نوی پێکبینن: “حکوومەتەک ل بەرژەوەندییا ئێکگرتوویی و سەقامگیرییا ھەرێم و هەمی عێراقێ بیت”.
دوهی ئێکشەمبی 20ێ ئۆكتۆبه‌رێ 2024 پرۆسا ده‌نگدانێ بۆ هه‌ڵبژارتنا په‌رله‌مانێ كوردستانێ بڕێڤەچوو، لگورەی ئەنجامێن دەستپێکێ پارتى دیموكراتى كوردستان وه‌ك هه‌می هه‌ڵبژارتنێن بەرێ ب هژمارەکا مەزن سەرکەفتیێ هه‌ڵبژارتنێیە و دهێتە چاڤەرێ کرن زێدەتر ژ 40 كورسىیێن په‌رله‌مانی ب ده‌ستڤە بینیت، بڕیارە ئێڤاریا ئەڤڕۆ كۆمسیۆنا بلندا سه‌ربه‌خۆىا هه‌ڵبژارتنان، ئه‌نجامێن دەستپێکێ ب فه‌رمى ڕابگه‌هینیت.