ناڤەندا نووچەیان – سەما
خيڤه‌تێن ئاواره‌يێن شنگالێ ل كه‌مپان يێن مه‌ترسى ل سه‌ر هه‌ى و كه‌ڤنبووينه، دوباره دێ ئێنه گوهۆڕين.
ده‌يان پير جه‌عفه‌ر، رێڤه‌به‌رێ كۆچ و كۆچبه‌ران و به‌رسڤدانا قه‌يرانا ل دهۆكێ، ئيرۆ ئێكشه‌مبێ، 8ـى چريا دويێ 2026، بۆ سه‌ما دبێژت: ل گه‌ل هاتنا وه‌رزێ زڤستانێ و پێخه‌مه‌ت پاراستنا گيانێ ئاواره‌يان ژ هه‌ر روودانه‌كا نه‌چاڤه‌رێكرى، بڕيار هاتييه دان كو ئه‌و خيڤه‌تێن ل كه‌مپان تێكچۆين و كه‌ڤنبووين بێنه گوهۆڕين و خيڤه‌تێن نوو ل جهێ وان بێنه دانان.
رێڤه‌به‌رێ كۆچ و كۆچبه‌ران به‌حس ل وێ چه‌ندێ كر، ئاليیێن په‌یوەندیدار د بزاڤان دان بۆ هندێ كو باشترین خزمەتگۆزارييان بۆ ئاوارەيان ل كه‌مپان دابين بكه‌ن، تاكو ده‌مێ زڤرینا وان بۆ زێدێ وان ل شنگالێ ب ڕه‌نگه‌كێ سه‌ربلنديانه دبت.
ده‌باره‌ى ده‌مێ گازا سپى بۆ ئاواره‌يان، ده‌يان پير جه‌عفه‌ر ئاشكراكر: نڤيساره‌ك ب فه‌رمى دايه وه‌زاره‌تا كۆچ و كۆچبه‌رێن عێراقێ و چاڤه‌ڕێى هاتنا گازا سپى بۆ ئاواره‌يان ب تايبه‌ت ل كه‌مپان دكه‌ين و هه‌ر ده‌ما گه‌هشت ئێكسه‌ر دێ ب سه‌ر ئاواره‌يان دا دابه‌ش كه‌ين.
ب گۆڕه‌يى ئاماران، پشتی داگیرکرنا شنگالێ ژ ئالييێ داعشێ ڤە ل سالا 2014ێ، نێزيكى 400 هه‌زار وه‌لاتيیێن ئێزدی ژ شنگالێ ئاوارە بوون و بتر ژ 12 سالان ڤە ل کەمپان زڤستانەکا سار و هاڤینەکا گەرم دەرباز دکەن، چاڤەڕێ دكرن ب جێبەجێکرنا ڕێککەڤتنا شنگالێ، ڤه‌گەڕنە زێدێ خۆ، لێ حکومەتا فیدڕال تا نهۆ ئامادە نەبوویە ڕێککەڤتنێ جێبەجێ بکەت.
پشتى بۆرينا 12 سالان ل سه‌ر جینۆسایدا ئێزدييان، هێشتا بتر ژ 270 هه‌زار ئاوارە ل ناڤ 15 كەمپان دا ماینە، هيڤیيا وان ئەوە كو ئەڤ ژیانا پڕ ژ خەم یا دبن خيڤەتان ب داوی بێت و جارەكا دی ڤه‌گەڕنە شنگالێ.