ناڤه‌ندا نووچه‌يان – سه‌ما
سالانه ل ده‌ستپێكا مه‌ها ئادار و نيسانێ، ب سه‌دان ئێزدى ژ وه‌لاتيێن جودايێن جيهانێ ڤه‌دگه‌رنه هه‌رێما كوردستانێ.
ئێزديان چه‌ندين هه‌لكه‌فتێن ئۆلى و جڤاكى ل مه‌هێن سێ و چار دا هه‌نه، پتريا رێوره‌سمان ل په‌رستگه‌ها لالش دئێنه گێران و ئێزدى ژ هه‌موو ده‌ڤه‌ر و وه‌لاتان به‌شداريێ تێدا دكه‌ن.
خفشێ خودێدا، ژنه‌كا ئێزدى يه بۆ ده‌مێ 9سالانه ل ئه‌مريكا دژيت و ڤه‌گه‌ريايه هه‌رێما كوردستانێ بۆ سه‌ما دبێژت: ئيرۆ گه‌له‌ك كه‌يفخۆشين مه سه‌ره‌دانا په‌رستگه‌ها لالش كرى و به‌شدارى رێوره‌سمێن سه‌فه‌را نان و ماستا بووين و ل به‌ر خۆكرنا جلكێن ئێزدياتيێ بۆ مه تشته‌كێ جوان بوو، هه‌روه‌سا كوردستانێ گه‌له‌ك پێشكه‌فتن بخۆڤه‌ديتيه و ژبه‌ر ئارامى و ته‌ناهيێ و پێكڤه‌ژيانێ ل سه‌رتاسه‌رى جيهانێ ده‌نگڤه‌دايه.
ژلايه‌كێ دى ڤه، لوقمان سلێمان، به‌رپرسێ راگه‌هاندنا په‌رستگه‌ها لالش بۆ سه‌ما گۆت: هه‌ر جار ل ڤى ده‌مێ ساڵێ ب سه‌دان ئێزدى ژ ئه‌ورۆپا، ئه‌مريكا، ئوستراليا و چه‌ند وه‌لاتێن دى يێن جيهانێ ڤه‌دگه‌رنه هه‌رێما كوردستانێ بۆ به‌شداريكرنێ ل رێوره‌سمێن ئۆلى و جڤاكى دا و ل گۆڕ زانياريێن مه ژ هه‌موو سالان پتر ئێزدى دێ ئێن.
رێورەسمێن هه‌ر ئێك ژ جه‌ژنێن چلێ زڤستانێ، جه‌ژنا سه‌رساڵێ، جەژنا چلێ ھاڤینێ و جەژنا جەمایێ و چه‌ند هه‌لكه‌فتێن دى ل په‌رستگه‌ها لالش دئێنه كرن.
په‌رستگه‌ها لالش دكەفتە قەزا شێخان سەر ب پارێزگه‌ها دهۆكێ، تاكە پيرۆزترين پەرستگه‌ها كوردێن ئێزدییە ل سەرانسەری جیهانێ، ئێزدی بۆ گێرانا ڕێورەسمێن ئۆلى و كه‌لتوورى سەره‌دانێ دكەن.