ناڤەندا نووچەیان – سەما
په‌رله‌مانتاره‌كێ ئێزدى ل ئه‌نجوومه‌نێ نوونه‌رێن عيراقێ راگه‌هاند، گه‌را ئێكێ يا دابه‌شكرنا گازا سپى ل سه‌ر ئاواره‌يێن شنگالێ ل كه‌مپان ده‌ستپێكريه، گۆتژى: “هه‌موو سه‌رۆك خێزان دێ گازێ وه‌رگرن”.
دووشه‌مبوويێ، 13ى كانوونا دووێ 2025ێ، مه‌حما خه‌ليل، ئه‌ندامێ په‌رله‌مانێ عيراقێ د راگه‌هاندنه‌كێ دا دياركر، ب بزاڤێن بەردەوام و سەرەدانێن مەیدانی و نڤیسارێن فەرمی ب پشتەڤانیا پارتی دیموکراتى کوردستانێ ، ئۆفیسا رێکخستنا پارێزگەها نەینەوا، لقێ 17 یێ پارتی ل شنگالێ و وەزارەتا ناڤخۆ یا هەرێما کوردستانێ، رەزامەندی ژلایێ جهێن پەیوەندیدارڤه هاتە وەرگرتن بۆ دابەشکرنا نەفتا سپی ل کەمپێن مام رەشان، شێخان، ئێسیان، باعدرێ، داودیە، ده‌رکارێ، بێرسڤی 1 و 2، چەم مشکۆ، قادیا و بۆ هەر سه‌رۆك خێزانه‌كى 100 لێتر ل ڤان کەمپان هاتنه دان.
ئه‌ندامێ په‌رله‌مانێ عيراقێ دبێژت: ” د ڤێ هەفتیێ دا، دێ گازا سپی ل کەمپێن دی یێن هەرێما کوردستانێ ئێتە دابەشکرن، زێده‌بارى ل قەزا شنگالێ و ناحيا گرعزێر دێ گازا سپى ب بها ئێتە دابەشکرن بۆ وان سه‌رۆك خێزانێن پلێتا سووتەمەنیێ نینن”.
مه‌حما خه‌ليل، ئاماژه ب وێ چه‌ندێ دا، پشتی تەمامکرنا دابەشکرنا گه‌را ئێکێ ل هەموو کەمپان، دێ گه‌را دوێ دەست پێ کەت، داکو د دەمێ زڤستانێ دا گاز بۆ هه‌موو ئاواره‌يانت بێتە دابینکرن.
ناڤبرى ته‌كه‌زكر، ل سه‌ر بزاڤێن خۆ دێ دبه‌رده‌وام بن بۆ سفككرنا ئێش و ئازارێن ئاواره‌يان ب تايبه‌ت ل ده‌مێ وه‌رزێ زڤستانێ دا.
ل پارێزگەها دهۆکێ و ئیدارا سەربەخۆیا زاخۆ 20 کەمپێن ئاوارە و پەنابەران هەنە.